Өктөм Чапаев сэлиэнньэтигэр «Өлүөнэ дойдута» физика-математика форумун тэлгэһэтигэр киирэр ааныгар Михаил Николаев үөрэммит учуутала СӨ норуотун хаһаайыстыбатын үтүөлээх үлэһитэ, Хаҥалас улууһун Бочуоттаах олохтооҕо Гаврил Федорович Саввиҥҥа анаан өйдөбүнньүк дуоска арыллыыта буолла. Бу тэрээһиҥҥэ Дьокуускайдааҕы эпархия протоирейэ Павел Слепцов кыттыбыта, ыраастаныы сиэрин-туомун сахалыы тылынан толоруута мустубут дьону астыннарда. Нэһилиэкпит баһылыга Александр Большаков Саввиннар дьиэ кэргэттэригэр махталын биллэрдэ.
Үөрэҕирии түмэлигэр
Гаврил Федоровичка төрөөбүтэ 110 сылынан анал экспозицияны билиһиннэрии тэрээһинэ учууталлыы сылдьыбыт оскуолатыгар, билигин Улуустааҕы үөрэҕирии түмэлигэр, ыытылынна. СӨ үтүөлээх учуутала Валентина Ноговицына киэҥ ис хоһоонноох этиитигэр Саввиннар учуутал династиялара үөрэхтээһиҥҥэ оруоллара улаханын, меценатствоны иилээн-саҕалаан илдьэ сылдьалларын үтүө холобур быһыытынан аҕынна. Ити кинилэр түмсүүлээхтэрин, бэриниилээхтэрин өрүү көрдөрөллөрүн, дойдуларын кытары сибээстэрин быспаттарын бигэргэтэрин, аҕалара үлэлээбит оскуолатыгар өйдөбүнньүк бэлиэлэрин туттаралларын махтана эттэ. Бу сырыыга Саввиновтар улахан кыыстара Людмила Гаврильевна өр сылларга хараллан сылдьыбыт аҕаларын илиинэн суруллубут үлэтин үөрүүлээх быһыыга-майгыга туттарбыта махталлаах.
Салгыы ахтыы киэһээ Михаил Николаев аатынан Өктөмнөөҕү наука үөрэх киинигэр буолла
Гаврил Саввин кыргыттарыттан манна Людмила, Зинаида дьоннорун туһунан оҕо саастан ахтыыллара долгутта, аҕалара ийэлэригэр истиҥ сыһыанын кэпсээн аһардылар. Ол курдук, сылаалаах үлэ кэнниттэн түүннэри кырачааннарын көрсөрүн, оҕолоругар болҕомтолооҕун, бириэмэ булан бодоруһарын, өрүү кэпсэтэ-сүбэлии сылдьар буоларын, араас оонньуулары, дьарыктары ыытарын, ону тэҥэ ыччаттарыттан ирдэбиллээҕин, эппиэтинэстээх буолууну биһириирин ахтан аһардылар. Киһи быһыытынан хайгыыр хааччыстыбата – сиэрдээх, дьоһуннаах буолуу. Кини бастыҥ үөрэнээччитэ Михаил Николаев оҕо эрдэҕиттэн оттомнооҕун, барыга бары эппиэтинэстээҕин, дуоспуруннааҕын бэлиэтии көрбүтүн кэпсиирин, кэлин бу оҕо ыраата барыа диэн этэрин өйдөөн хаалбыттарын бэлиэтээтилэр.
Гаврил Саввин оҕолоро үөрэхтээһин суолтатын хас биирдиилэрэ иҥэринэн олохторун устата тутуспуттар. Тоҕус оҕо бары үрдүк үөрэхтэнэн дьоһун үлэһит, дьиэ кэргэн буолан сылдьаллар, ол иһигэр Санкт-Петербург бэрэстэбиитэлистибэтигэр, өрөспүүбүлүкэ күндү таастарын харайыыга эппиэттээх үлэһиттэр о.д.а.
Бу бэлиэ тэрээһиҥҥэ үөрэх салалтатыттан Альберт Реев кэлэн кытынна, махтал суруктары туттарда, оскуола бибилэтиэкэтигэр сыаналаах кинигэлэри бэлэхтээтэ.
Уулаах Аан оскуолатын дириэктэрэ Гаврил Максимов Саввиннар династиялара оскуола, общественность олоҕор оруоллара улаханын, холобур быһыытынан салҕанан иһэрин, дьиэ-кэргэн оруола үрдүүрүгэр кылааттара улаханын, меценатство үтүө үгэһэ дириҥ суолтата, сыаната кэмнэммэт буоларын бэлиэтээтэ.
Нэһилиэк, оскуола, дьиэ кэргэн бииргэ үлэлээһинэ сайдыыга аҕалара көстөн иһэр. Урукку үөрэнээччилэриттэн оскуолаҕа үлэлээбиттэртэн Александра Дмитриевна Семенова Уулаахтан Гаврил Федорович үтүө холобуругар иитиллибитин, общественнай үлэҕэ буспутун-хатарыллыбытын тиийимтэтик кэпсээбитэ сэҥээриини ылла.
Бу көрсүһүүгэ сэҥээрэ көрбүтүм – бииргэ үлэлээбит учууталларын оҕолоро кэлэн кыттыбыттара буолар. Ол курдук, Шадрин Юрий Владимирович, Дмитриев Георгий Михайлович, ону сэргэ Неустроев Николай Васильевич кыргыттара о.д.а. кэлэн ахтыы оҥорон сэргэхситтилэр. Иллээхтэрэ, түмсүүлээхтэрэ, баччааҥҥа диэри билсэ, өйөһө сылдьаллара ытыктабылы үөскэтэр.
Барҕа махтал тэрийээччилэргэ – Саввиннар дьиэ кэргэттэригэр, Үөрэхтээһин түмэлигэр, Наука-үөрэх киинин кэлэктиибигэр, дириэктэр Юрий Шадриҥҥа, солбуйааччыта Марина Алексееваҕа, дириҥ ис хоһоонноох көрсүһүү тэриллибитигэр.
Раиса Сысоева, үлэ бэтэрээнэ, Өктөм нэһилиэгин Бочуоттаах олохтооҕо, «Хаҥалас» хаһыат общ. кэрэспэдьиэнэ.