Былатыан Ойуунускай аатынан Саха академическай тыйаатыра от ыйын 2 күнүгэр Саха Өрөспүүбүлүкэтин үтүөлээх артыыһа Михаил Егорович Семенов 80 сааһын туолар үбүлүөйүгэр анаан Иван Алексеев «Суоралдьыйа Толбонноох» испэктээкилигэр аймахтарын, табаарыстарын, билэр дьонун ыалдьыттата ыҥырда.
Михаил Егорович П.А.Ойуунускай аатынан Саха тыйаатырын, киинэ артыыһа. Кини 1943 сыллаахха от ыйын 1 күнүгэр Орджоникидзевскай оройуонугар (билигин Хаҥалас улууһа) Улахан Ааҥҥа төрөөбүтэ. 1969 сыллаахха Новосибирскайдааҕы театральнай училищены драма артыыһын идэтигэр үөрэнэн бүтэрбитэ. 1969 сылтан П.А.Ойуунускай аатынан тыйаатырга үлэлиир.
Михаил Семенов элбэх испэктээкиллэргэ араас оруолларга оонньоон кэллэ. Ол иһигэр, Чингиз Айтматов «Ийэ сир» айымньытыгар Джайнак, Платон Ойуунускай «Дойду оҕото Дорогуунап Ньукулайга Ньондор кулуба, Амма Аччыгыйа, «Сааскы кэмигэр» Боллоорутта, Баһылай Харысхал «Эргиллиэм хайаан да…» испэктээҕэр Юмшановы, Николай Лугинов «Чыҥыс Хаан ыйааҕынан» айымньытыгар Кырдьаҕас Буойуну, Иван Гоголев «Хара кыталыгар» Мотуос кинээһин о.д.а.
Киинэҕэ оонньообут оруоллара: Манчаары — «Дождь после засухи», телевизионнай киинэ (режиссёр Г.Раевскай), Кеша — «Куба-любовь моя» (режиссёр С. Ермолаев, «Алмазфильм»), Бэрээдьинэ -«Биһирэм» (реж. Г. Бальшаков), Омоҕой баай-историческай документальнай киинэ «Страна Олоҥхо» («Мосфильм»), Господин—«Покуда будет ветер» (реж. С. Потапов).
Михаил Семенов дьоһун ыал аҕата, биэс сиэн эһээтэ буолар. Кэргэнэ Луиза Викторовна 46 сыл Дьокуускайдааҕы медколледжка үлэлээбитэ, РФ уонна СӨ доруобуйа харыстабылын үтүөлээх үлэһитэ. Семеновтар уолаттара юристар — Леонид ЯТЭК юридическай сулууспатын салайааччыта, Егор «Якутопторг» тэрилтэ флотка уонна логистикаҕа салаатын сүрүн исписэлииһэ. Сиэннэр улааталлар — улаханнара мединститут бэһис кууруһун устудьуона, кыралара оскуолаҕа барар.
Бу дьоро күн Михаил Семеновка «Тиит Арыы Бочуоттаах олохтооҕо» аата иҥэриллибитин туһунан дастабырыанньаны Тиит-Арыы дьаһалтатын баһылыгын солбуйааччыта Софья Кузьмина туттарда.
Биһиги дьиэ кэргэн ыҥырыллан киирэн олус үчүгэй испэктээкили көрөн астынан аҕай кэллибит.
Варвара Кузьмина