“Мин ырыа кэһиилээх кэлиэҕим” күрэс ырыа куттаахтары түмтэ

Покровскай куорат  “Саргы түһүлгэтэ” култуура  киинигэр баар суох ытыктыыр, дьоһун киһибит, Саха Өрөспүүбүлүкэтин култууратын үтүөлээх үлэһитэ, Россия, СӨ култууратын туйгуна, самодеятельнай композитор, Дархан оһуокайдьыт, алгысчыт Егор Степанович Кампеев үбүлүөйдээх сылыгар анаан “Мин ырыа кэһиилээх кэлиэҕим” аһаҕас өрөспүбүлүкэтээҕи ырыа күрэһэ бэрт сэргэхтик, үрдүк таһымнаахтык ааста.

Күрэс кыттыылаахтара балаһыанньа ирдэбилинэн Егор Кампеев биир ырыатын уонна иккис ырыаларын көҥүл талан толордулар.

Бу күн күрэскэ кыттыыны ыллылар: Өктөмтөн Фоминнар дьиэ кэргэн, Нөмүгүттэн “Тирэх”, “Талба” ансаамбыллар, Пелагея Семенова, Төхтүртэн Николай Макаров, Хоточчуттан Петр Пестеров, Покровскай куораттан“Дьулуур” ансаамбыл, Дмитрий Ющенко, Мохсоҕоллоохтон “Иһирэх” дьахталлар ансаамбыллара, Таатта улууһун Уус Таатта сэлиэнньэтиттэн Марфа Тарабукина, Чурапчы Чакырыттан Елена Сивцева, Дириҥтэн ”Алаас кыргыттара” дьахталлар ансаамбыллара.

Дьүүллүүр сүбэҕэ  СӨ норуодунай артыыһа, ырыа айааччылар Сойуустарын бэрэссэдээтэлэ Алексей Егоров (дьүүллүүр сүбэ бэрэссэдээтэлэ), СӨ култууратын үтүөлээх үлэһитэ, Саха сирин биллиилээх мелодиһа Степан Васильев, Покровскайдааҕы Оҕо искусствотын уһуйааччыта, СӨ бочуоттаах үлэһитэ Людмила Артамонова, ХИФУ финансовай -экономическай институтун преподавателэ, Егор Степанович төрөппүт кыыһа Елена  Кампеева, Хаҥалас улууһун Арчы Дьиэтин салайааччыта, СӨ култууратын үтүөлээх үлэһитэ Лидия  Харитонова үлэлээтилэр.

Күрэс түмүгүнэн кыайыылаахтарынан ааттаннылар:

Бастакы үктэл – “Талба” дьахталлар ансаамбыллара (салайааччы Юлия Попова) Ой с.

Иккис үктэл – Анатолий Гуляев, Орто Халыма.

Үһүс үктэл – Дмитрий Ющенко, Покровскай куорат.

Бастакы үрдэл — Пелагея Семенова, Ой с.

Иккис үрдэл – Петр Пестеров, Хоточчу с.

Үһүс үрдэл – Фоминнар дьиэ кэргэн, Өктөм с.

Кылаан Чыпчаал Чурапчы Дириҥиттэн кыттыбыт “Алаас кыргыттара” ансаамбыл   (сал. Фекла Попова).

Күрэс гала-кэнсиэринэн түмүктэннэ. Бу күн ылбаҕай ырыаларынан кэнсиэри киэргэттилэр Степан Васильев, Елена Кампеева, “Эркээни эдэр сааһа” народнай үҥкүү ансаамбыла, күрэһи уонна кэнсиэри иилээн-саҕалаан ыытта Арчы Дьиэтин үлэһитэ Прасковья Лебедева, сценарийын суруйан бэлэмнээтэ Мотрена Гаврильева.

Кэлбит дьон кэнсиэри астына-дуоһуйа көрдүлэр, тэрийээччилэргэ барҕа махтал тылларын эттилэр.

Сүрүн бирииһи Е.С. Кампеев дьиэ кэргэнэ 25 000 солкуобайы уу харчынан туттардылар, Хаҥалас улууһун култуураҕа салалтата, Арчы Дьиэтэ «ДНС» маҕаһыынтан  сертификат туттардылар. Бу тэрээһиҥҥэ спонсордаан көмөлөстүлэр Покровскай куорат дьаһалтата, Е.С.Кампеев өр сылларга үлэлээбит тэрилтэлэрэ — Покровскай 1-кы, 2-с №№-дээх оскуолалара, Г.В.Ксенафонтов аатынан кыраайы үөрэтэр түмэл.

Кыттыбыт дьоҥҥо Кампеевтар ааттарыттан махтал суруктары туттардылар, Егор Степанович  олоҕун аргыһа, Хаҥалас улууһун бочуоттаах олохтооҕо  Зинаида Иннокентьевна Кампеева анал тус бириистэрин  Фоминнарга уонна Пелагея Семеноваҕа  истиҥник махтанан туран туттарда.

Күрэс кыттыылаахтара бу тэрээһиҥҥэ кэлэн кыттыбыттарыттан астынан-дуоһуйан тарҕастылар.

Дьүүллүүр сүбэҕэ идэлээх дьон үлэлээн күөн-күрэс таһыма олус ирдэбиллээхтик ааста. Түгэнинэн туһанан ыҥырыыбытын ылынан кэлбит дьоһун дьоммутугар тэрийэр бөлөх аатыттан барҕа махталбытын этэбит.

Егор Кампеев баара  буоллар ааспыт сыл ыам ыйын 24 күнүгэр 85 сааһын туолуохтаах этэ. Үбүлүөйдээх сылын чэрчитинэн 2024 сылга улууспутугар кини аатынан эр дьоҥҥо анаан оһуокай күрэһин ыыппыппыт. Ытык киһибит үтүө аатын өрө тутаммыт, кини аатын үйэтитэр, ылбаҕай ырыаларын дьоҥҥо-сэргэҕэ тарҕатар туһуттан маннык тэрээһиннэри үбүлүөйдээх бэлиэ сылларыгар ыытан сайыннаран, үтүө  аатын ааттатан, үүнэр көлүөнэ ыччаты дойдуга бэриниилээх буолууга иитэн таһаарарга олус бэртээхэй бырайыак. Пелагея Семенова толорбут Леонид Попов тылыгар Егор Кампеев “Урааҥхайдыы Уруй!” ырыатын Кыайыы 80 сылыгар анаан Эркээни ыһыаҕар улуус түмүллүбүт хорун толоруутугар ыллаппыт киһи диэн санаа киирдэ.

Лидия Харитонова.