Россияҕа устудьуоннар тутар этэрээттэрин күнүгэр
Москва куорат Ленин уордьаннаах физическай култуура уонна спорт институтугар үөрэнэр сылларын үтүөкэннээх киһи, милииссийэ саппааска полковнига Валерий Федоров олус үтүөтүк-истиҥник ахтар. Бүгүн Россияҕа устудьуоннар тутар этэрээттэригэр үлэлэспит кэмнэрин санаан ылла.
— Дойдубут тэбэр сүрэҕэр — Москва куоракка Ленин уордьаннаах физическай култуура уонна спорт институтугар көҥүл тустуу тириэньэригэр үөрэнэр кэмнэрбэр устудьуоннар тутар этэрээттэригэр 1970-1972 сс. үлэлээбитим. Мин Казаков уулусса 18 №-гэр баар И.В. Сталин аатынан физкультура институтугар үс сыл үөрэнэ сылдьыбытым. Кэлин физкультура научнай института буолбута. Устудьуоннар тутар этэрээттэригэр киирэн, Москва анныгар, куораттыы тииптээх Лотошино диэн бөһүөлэккэ стадион тутуутугар, итини таһынан Москваҕа Сиреневай бульвар 4 №-дээх аадырыһыгар баар ГЦОЛИФК саҥа тутуллар сүүнэ дьиэтин тутууга уонна ыарахан атлетика дыбарыаһын тутууларыгар кыттыыны ылбытым. Ити тутууларга устудьуоннар бары тахсан олус элбэх киһи үлэлиирэ. Саха уолаттарыттан олимпийскай чөмпүйүөн Роман Дмитриев быраата Гаврил Дмитриев, тустуутунан аатырар «Саха Чапаайа» уонна Чурапчыттан Толя Попов бааллара. Анатолий Попов билигин Дьокуускай куоракка олорор, — диэн эдэр сааһын эрчимнээх саастарын ахтан-санаан ааста Валерий Петрович.
Ити сүдү тутууларга үлэлээбит эдэр сааһын үтүөкэннээх кэмнэрэ, үгүс умнуллубат түгэннэрдээх ааспытын сааһыран олорон долгуйа ахтар. Бу барыта билиҥҥи ыччат дьон, аҕа көлүөнэ олорон ааспыт историятын сиһилии билэригэр, кини холобуругар патриотическай тыыҥҥа иитиллэригэр ураты суолталаах.
Уйбаан УЙГУУРАП,
хаартыскалар В.П. Федоров архыыбыттан туһанылыннылар.