Норуот суруйааччыта Николай Лугинов Хаҥаласка сырытта

Улуу Кыайыы 80 сылын көрсө Покровскайга Г.В. Ксенофонтов аатынан кыраайы үөрэтэр түмэлгэ Николай Лугинов фронтовик-суруйааччы Исай Никифоров 110 сылынан тэриллибит улуус дьаһалтатын хамыыһыйатын актыбыыстарын кытары көрүстэ, бэлиэ даатанан туох үлэ барарын кытары билистэ.

Ол курдук, суруйааччы бэлиэ сылын көрсө киинэ бэлэмнэниллэ сылдьарын, литературнай түмэл арыллыытыгар үлэ барарын, общественнай кэрэспэдьиэннэргэ улуус хаһыатын, үөрэх салаатын, 5-Малдьаҕар дьаһалтатын кыттыгастаах бириэмийэлэрэ туттарылларын, Исай Никифоров «Кырачаан булчуттар»кинигэлэрэ тахсарын, уулуссата аспаалланарын, литературнай экспедиция тэриллэрин о.д.а. туһунан олохтоохтор кэпсээтилэр.


Таарыччы этэр буоллахха, Николай Лугинов буойун-суруйааччыны кытары эдэр эрдэҕинэ билсэн ааспытын, оччолорго Хаҥалас балыыһатыгар үлэлии сылдьыбыт быраас Василий Ивановтуун дьиэтигэр көрсөллөрүн истиҥник ахтан ааста, суруйааччы урусхаламмыт Берлин рейхстагын Гитлер бункерыгар, ол былдьаһыктаах күннэргэ мээнэ дьону киллэрбэт этилэр эрээри, биһиги чулуу уолбут онно киирэн хаама сылдьыбытыттан сөхпүтүн биллэрдэ уонна хаҥаластар дьоһун киһилэрин үтүө аатын үйэтитиигэ үлэлииллэрин сэргээтэ, туох кыалларынан суруйааччылар өйүөхпүт диэтэ.

Людмила Аммосова.