Кытыл Дьураҕа Уһун Күөл кытыытыгар, урукку ыһыахтыыр сиргэ, сүрдээх сонун, сэргэх тэрээһин ыытылынна. Нэһилиэк тэрилтэлэрин икки ардыгар «Ньукуолун миинэ — 2024» диэн тыҥааһыннаах күрэх буолла.
Манна көхтөөх кыттыыны оскуола, уһуйаан, балыыһа, ОДьХХ уонна олохтоох дьаһалта, ДЭС, маҕаһыыннар холбоһуктаах хамаандалара ыллылар.
Бу күрэххэ хамаандалар мас эрбээн, хайытан, кутаа оттон, кус үргээн, эттээн ону сууйан-сотон сүрдээх минньигэс кус миинин буһаран, кутааҕа оргуйбут минньигэс чэйдээх сандалы маанытын тардан дьүүллүүр сүбэни күндүлээтилэр.
Балыыһа кыталык кыргыттара уонна ОДьХХ кыахтаах уолаттара бастыҥ бириэмэни көрдөрөн 10 тыс. солкуобай уу харчынан наҕараадаланнылар. Иккис бочуоттаах миэстэни оскуола, уһуйаан хамаандата ылла, үһүс бириистээх миэстэҕэ олохтоох дьаһалта, ДЭС, маҕаһыыннар холбоһуктаах хамаандалара тигистэ.
Минньигэс миининэн, «Ахтылҕан» ансаамбыл кыттыылахтара сылаас алаадьыларынан нэһилиэк олохтоохторун уонна ититии ситимин тардааһыҥҥа үлэлэһэ сылдьар биригээдэни күндүлээтилэр.
Бу күн көрдөөх оонньуу арааһа ыытылынна, дьон-сэргэ күөххэ үктэммиччэ, самаан сайын салаллыбытыттан үөрэн, сүргэлэрэ көтөҕүллэн тарҕастылар. Күрэхтэһиини тэрийбит хамыыһыйаҕа, дьүүллүүр сүбэҕэ, кыттааччыларга барыгытыгар барҕа махтал тиэрдэбит.
Видео по ссылке в тг:
Балжит Емельянова, Кытыл Дьура с.