Оҕо сайыҥҥы сынньалаҥа
Ааспыт өрөбүлгэ А.В. Дмитриев аатынан Ой орто оскуолатыгар үлэлиир үөрэнээччилэр научнай экспедицияларын оҕолорун бөлөҕө салайааччылара педагог Прокопий Ноговицынныын Өктөм нэһилиэгин Чапаев сэлиэнньэтигэр Наука дьоҕус Академиятыгар (МАН) үлэлиир лааҕырга ыалдьыттаан кэллилэр. Эдэр чинчийээччилэр үс чымадаан муҥунан араас походтарыттан экспонаттары, ону сэргэ хаартыскалардаах, кинигэлэрдээх бартыбыаллаах баран сэдэх быыстапканы билиһиннэрэн кэллилэр. Лааҕыр 77 оҕото саастыылаахтарын булумньуларын олус кэрэхсии көрдүлэр, хас биирдии экспонат историятын сэргии иһиттилэр.
Биһиги оҕолорбут билиилэрэ-көрүүлэрэ үгүс. Эрсан Титов бизоннар тустарынан кэпсээтэ, Проня Ноговицын акулалары, бу балыктар тиистэрин эҥин туһунан сырдатта, Саша Анисимов трилобиттары хайдах булбуттарын сэһэргээтэ. Науканан интэриэһиргиир, историяны үлүһүйэр оҕолорго барыта сонун, дьикти – мамонт кыыл кырамтата, түүтэ, улар соҕуотуттан мас иннэтин сыта, түҥ былыргы дьон туттар сэптэрэ, тэриллэрэ. Айсен былыргы дьикти күлүүс хайдах арылларын көрдөрдө. Сандаллаах Проня Ноговициннар плезиозавр – мамоннар трехмернай моделларын, трилобиттары, ону сэргэ хататы туттан уот саҕалларын о.д.а. былыргы дьон сатабылларын билиһиннэрдилэр.
Түмүккэ Дьоҕус Академия дьиэтигэр сынньана, дьарыктана сылдьар оҕолор «Эллэйаада» чинчийээччилэрин кытары хаартыскаҕа түстүлэр. Хаһаайыттар оҕолорбутугар бэлэх-туһах туттардылар, махтал тылларын этэн атаардылар, дьиэлэрин-уоттарын көрдөрдүлэр. Маннык көрсүһүүлэр, учуонайдары кытары үлэ оҕолору хайа да өттүнэн билиигэ-көрүүгэ көҕүлүүллэр, интэриэһи үөскэтэллэр.
Көрсүһүү кэнниттэн Дьоҕус Академия салалтата «Эллэйаада» экспедицияны кытары бииргэ салгыы үлэлииргэ төгүрүк остуол тула олорон кэпсэтиини тэрийдэ. Үлэлииргэ төрүөт үгүс, Эркээни хочотугар даҕаны чинчиллэ илик үгүс. Араас хайысхаларынан маршруттары арыйан үлэлииргэ кыах толору баар.
Людмила Аммосова.