Оҕолорбут ситиһиилэрэ барыбытын үөрдэр

Бу күннэргэ «Инникигэ хардыы» НПК түмүктэннэ, онно П.С. Скрябин аатынан 1-кы Дьөппөн орто оскуолатын үөрэнээччилэрэ ситиһиилээхтик кытта кэллилэр.

«Тохсунньу 10-11 күннэригэр ыытыллыбыт «Инникигэ хардыыга»  биһиги оскуолабытыттан 7 кылаас үөрэнээччитэ Санаайа Очиржапова (салайааччыта Очиржапов О.Б.) уонна 5 кылаас  үөрэнээччитэ Айыына Маркова (сал. Прокопьева С.И.) кытыннылар. Айыына «Сылгы өҥүн-дьүһүнүн уонна сааһын наардааһын» диэн тиэмэнэн  аҕатын Сергей Петрович Марков сылгыларын ырытан, ааҕан-суоттаан дакылаат оҥорбута. Сылгыга сыһыаннаах эбит диэн биһигини тыа хаһаайыстыбатын сиэксийэтигэр укпуттара. Бастаан бу үлэбитинэн улуус күрэҕэр лауреат аатыныламмыт үөрбүппүт. Онтон салгыы Айыына куоракка чулууттан-чулуу оҕолору кытта күрэхтэстэ. Уопсайынан, бу кэмпириэнсийэҕэ тыһыынчаттан тахса оҕо араас хайысхаларга кытынна. Бастакы күн «Триумф» киэҥ уораҕайыгар стендэнэн көмүскээһин буолла. Долгуйуу кытаанаҕа манна этэ, көрдөххө дакылааттар барыта нууччалыы тылынан этилэр. Ол да буоллар, тургутууну уонна сыыйыллыыны ааһаммыт иккис күҥҥэ кыттар чиэскэ тиксибиппит. 27 дакылаат ааҕылынна. Эппиппит курдук, биһиги эрэ үлэбит төрөөбүт тылбытынан  кэпсэннэ. Аны туран, юниор эҥин диэн араарбакка барыларын тэҥҥэ истэллэр уонна сыаналыыллар эбит. Ол да буоллар, туох баар кыахпытынан, чаҕыйбакка кииристибит. Бэлиэтээн эттэххэ, Айыына, 5 кылаас  оҕото, аан бастаан маннык киэҥ далааһыннаах күрэххэ эрэллээхтик, түмүллэн, мөлтөөн-ахсаан биэрбэккэ кыттыбыта үөрдэр. Бу кини эппиэтинэстээҕин, оскуолатын, дьонун аатын түһэн биэрбэт санаатын өссө төгүл бигэргэттэ. Дьүүллүүр сүбэ эрэдьиэстээх соҕус ыйытыктарыгар астыннарар гына хоруйдаан 1 миэстэлээх дипломунан наҕараадаланна. Оттон Санаайа Очиржапова «Спорт уонна ЗОЖ» диэн сиэксийэҕэ 3 миэстэ буолан үөрүүбүт өссө улаатта, өрөгөйбүт үрдээтэ!

Бастатан туран,  үөрэнээччибэр Айыынаҕа, кини төрөппүттэригэр, оскуолам салалтатыгар Николай Иннокентьевич Гоголевка, Лена Петровна Ефремоваҕа, Варвара Валерьевна Жигаловаҕа уонна күүс-көмө буолбут, үөрүүбүтүн тэҥҥэ үллэстибит коллегаларбар махтанабын«,диэн саха тылын, литэрэтиирэтин учуутала Софья Ивановна Прокопьева  кэпсээтэ.  

Оҕолору чинчийэр үлэҕэ сыһыарар педагогтарбытыгар инникитин да бу курдук ситиһии кэлэ турдун диэн баҕарабыт, оттон маннык салайааччылаах үөрэнээччилэр үрдүктэн үрдүк  таһымҥа тахсыахтара диэн бигэтик эрэнэбит.

Анастасия Мордовская, Тиит Эбэ с.