Алтынньы 27 күнүгэр М. К. Аммосов аатынан ХИФУ бирииһигэр Үөрэтэр-лабораторнай куорпуска кыргыттар, уолаттар, дьахталлар, эр дьон уонна бэтэрээннэр ортолоругар оҕунан ытыыга I аһаҕас өрөспүүбүлүкэтээҕи турнир буолан ааста.
Күрэххэ “Куобах”, “Кус”, “Тииҥ” көрүҥҥэ кииристилэр, түмүгэр сууматынан быһаарыстылар. 2007 сыллаах төрүөх кыргыттар уонна дьахталлар 20 миэтирэҕэ, уолаттар уонна эр дьон 25 миэтирэҕэ ыттылар. Бэтэрээннэр 1975 сыллаах төрүөх уонна онтон үөһэ саастаах дьахталлар 20 миэтирэ, 1970 сыллаах төрүөх уонна үөһэ саастаах эр дьон 25 миэтирэ ыраахха ытан холоннулар.
Бу турнирга барыта 84 охчут Өлөөн, Нам, Горнай, Томпо, Хаҥалас, Бүлүү, Орто Халыма улууһуттан, Дьокуускай куораттан, 29-с №-дээх орто оскуолаттан, ХИФУ-тан, Дьокуускайдааҕы педагогическай колледжтан, Физкультура уонна спорт институтуттан кытыннылар.
Хаҥалас улууһуттан 15 охчут күрэххэ кииристэ. Кыргыттарга Александра Николаева 18 кыттааччыттан 27 очкону ылан кыһыл көмүс мэтээлинэн наҕараадаланна. Эр дьоҥҥо 14 киһи кыттыбытыттан Александр Осипов 18 очколанан кыһыл көмүс мэтээли иилиннэ, Владислав Пермяков 15 очколаах боруонса мэтээли ылла уонна Клим Яковлев икки очконан хаалан төрдүс миэстэҕэ тигистэ. Бэтэрээннэргэ 12 киһи кытынна, Владислав Ушницкай 16 очкону ылан төрдүс миэстэ буолла. Абсолютнай чемпионунан дьахталларга Мария Кусатова (Хотой), эр дьоҥҥо Намтан Семен Бурнашев буоллулар.
Спортсменнар спорт бу уустук көрүҥүн кистэлэҥнэрин баһылыыллар. Манчаары XXII-с спартакиадатыгар путевка ыларга бэлэмнэнэн салгыы дьаныардаахтык эрчиллэллэр. Охчут дьоннорбутугар үрдүк ситиһиилэри баҕарыаххайыҥ!
Василий МОЖУКОВ, СӨ спордун бэтэрээнэ,
Покровскай к.