Ойор-тэбэр оҕо сааска олорбут күндү дьиэбит

Күндүтүк саныыбыт,

Ахтабыт ол ааспыт сыллары,

Сырдык, сылаас 

интэринээти

Ойор-тэбэр оҕо сааска

Олорбут күндү дьиэбитин.

Интэринээккэ олорбут

Араас саастаах оҕолору,

Бары иллээх буоларбытын

Баспытаатал ирдиирэ.

Үлэһит сэбиэдиссэй 

дьаһала-

Дьиэтин иһэ ырааһа,

Аһыыр аспыт минньигэһэ.

Интэринээт үлэһит 

дьонноро

Араас иитиилээх оҕолору,

Сатамньылаахтык салайан

Сыраҕытын уураргыт.

Кыһамньылаах 

үлэһиттэрбит,

Холобур буолар дьоннорбут,

Истиҥ-амарах 

сыһыаҥҥытын

Олус күндүтүк саныыбыт.

1967 с. 2-Малдьаҕар 8 кылаастаах оскуолатыгар маҥнайгы кылааска үөрэнэ киирбитим. Төрөппүттэрбит сопхуоска сүөһү көрүүтүгэр үлэлииллэрэ, онон сайынын алааска, кыһынын арыыга олороллоро. Онон оҕолоро бары интэринээккэ олорон үөрэммиппит. Дьиэбит Пятилетка уулусса 24-гэр турара.

Сэбиэдиссэйинэн Пудов Аркадий Алексеевич, иитээччи Ирина Гаврильевна Иванова, повардар Юлия Михайловна Плетцер, Мария Ивановна Олесова, ньээҥкэнэн Ульяна Алексеевна Васильева, техүлэһиттэринэн Емельянова Аграфена Петровна, Львова Мария Николаевна, Лукина Евдокия Петровна үлэлээбиттэрэ.

Ол кэмҥэ телевизор, радио суох этэ. Аркадий Алексеевич хаһыаттан сонуннары, буола турар событиелары кэпсиирэ, дьээбэлээх-кэпсээннээх буолааччы. Мария Ивановна ырыа ыллааччы, Ирина Гаврильевна индийскэйдии үҥкүүлээччи, биһиги оҕолор эмиэ ким тугу сатыырынан ыллааччыбыт, үҥкүүлээччибит. Сатабыллаах үлэһиттэрбитинэн интэринээппит сылаас, ыраас, аспыт минньигэс-тотоойу буолара.

1972 с. саҥа оскуола үлэҕэ киирбитин кэннэ, эргэ оскуолаҕа интэринээт, оҕо саада буолбута. Дьобулҕаттан, Еланкаттан элбэх оҕо кэлэннэр, ахсааммыт элбээбитэ. Олохтоох оҕолор интэринээккэ олорбот буолбуттара. Эргэ оскуола интэринээт буолбутун кэннэ, эрдэ олорбут дьиэбитигэр аһыырбыт, онтон саҥа оскуола остолобуойугар аһыыр буолбуппут. Киэһэ аһылык кэнниттэн утуйуохха дылы таһырдьа уулуссаҕа оонньуурбут. Интэринээппитигэр араас иитиилээх, быһыылаах-таһаалаах (ытанньах, хаппырыыс, мэник, охсуһуук, көрсүө) оҕолор бааллара, ону үтүө үлэһиттэр сыһыаннарынан, сатабылларынан, биир улахан ыал курдук бэркэ олорбуппут. Эргэ оскуола-интэринээппит 5 хостооҕо, 2 хос уолаттарга, 3 хос кыргыттарга ананара.

Биһиги 4 кыыс биир хоско олорбуппут. В. Ася, С.Галя, Д. Маша уонна мин. Сарсыарда оскуолаҕа барарга кыра кылаас кыргыттарын баттахтарын өрөрбүт, өрөбүлгэ таҥастарын (маҥан саҕаларын, галстуктарын) сууйан, өтүүктээн, уруок ааҕарга кыра кылаастарга көмөлөһөрбүт. Кулуупка индийскэй киинэ буоллаҕына, биһиги кыргыттар оҕо көрсөөрү ыалга барар этибит.

Күһүн хортуоппуй хостооһунугар ыалларынан тарҕаһан үлэлиирбит. Бу эргэ оскуолаҕа, интэринээккэ олоро сылдьыбыт кэмнэрбэр сэбиэдиссэйдэринэн Иванов Игнатий Васильевич, Мохначевскай Иван Алексеевич, иитээччилэринэн Павлова Елена Сергеевна, Иванова Матрёна Семёновна, Максимова Надежда Степановна, ньээҥкэнэн Лукина Изольда Семёновна, поварынан Олесова Мария Ивановна, Данилова Анна Ивановна, оһох оттооччунан Олесов Михаил Гаврильевич үтүө суобастаахтык үлэлээбиттэрэ.

Игнатий Васильевич утуйаа-ры сыппыппыт кэннэ кэлэн, атах таҥастарбытын көрөн-истэн, куурда уурталыыра уонна тэстибит хаатыҥкалары дьиэтигэр илдьэ барара, сарсыарда уллаһыллыбыт хаатыҥкаларын аҕалара, оҕолорго сүрдээх кыһамньылаах-сатабыллаах үлэһит этэ.

Оскуолабыт үбүлүөйүнэн истиҥник эҕэрдэлээн туран, интэринээккэ бииргэ олорбут оҕолорбун, биһигини оҕолорун курдук бүөбэйдээбит үлэһиттэрбитин истиҥник эҕэрдэлиибин! Бары этэҥҥэ доруобай сылдьан, уһун үйэлээх олохтонуҥ диэн баҕарабын.

Зинаида Иванова (Макарова)