Олоххо-көхтөөх далбар-хотун Альбина Константинова

Үлэ дьоно

Биһиги төрөөбүт түөлбэбитигэр  киһи кэрэхсиир  дьоно элбэх. Нуучча өһүн хоһоонугар  «Где родился там и пригодился» диэн баар. Ол курдук, Кыһыл Үрүйэбитигэр төрөөн, улаатан үөрэнэн,   идэ ылар эрэ кэмигэр дойдутуттан кыра кэмҥэ тэйэн баран, онно да төрөөбүт түөлбэтигэр ахтылҕаҥҥа куустаран  иитээччи идэтин баһылаан эргиллэн ханна да тэйбэккэ  олорор дьоһун киһинэн ЯковлеваКонстантинова Альбина Николаевна буолар.

Ньукулай, Хобороос  Яковлевтар икки игирэ кыраһыабай кыргыттары, Аняны, Альбинаны, 1948 сыллаахха ыам ыйын  22 күнүгэр самаан сайын кэлиитэ төрөппүттэрэ.  Альбина оҕо сааһа иллээх дьиэ кэргэҥҥэ ааспыта. Оҕо эрдэҕиттэн үлэлии үөрүйэх кыыс оскуола кэнниттэн Ленин аатынан колхоз Кыһыл Үрүйэтээҕи отделениетын бастакы ыччат-комсомольскай ферматыгар  биэс буоланнар ыанньыксыттыы кэлбиттэрэ. Ити Кыһыл Үрүйэбит  историятыгар сурулла сылльар.

Альбина Николаевна олох эдэр эрдэҕиттэн ырыаны таптыыр, ордук ансаамбылынан ыллыырга сүрүн оруолу ылаааччы. Кини сахалыы ырыаларбытын бастакы, иккис куоласка арааран ыллыырга кулууппутугар  бэйэтэ репетитор курдук.  Уус-уран самодеятельность көрүүлэригэр  куруутун  кыттаааччы. Ииттээччи идэтинэн үлэлээн элбэх Кыһыл Үрүйэбит кэрэ кэнчээрилэрин 40-тан тахса сыл ииппит киһи. Кини кэпсиир остуоруйаларыгар  уонна оҕо  сайдар дьоҕурун уһугуннарарга уруһуйдуур, пластилинынан дьүһүйэр дьикти талааннаах иитээччи. 1975сыл сайын бииргэ үөрэммит  уолунаан Владимир Константиновтыын ыал буолбуттара. Сыл-хонук дииллэр. Дьоллоох ыал 4 оҕону төрөтөн, иитэн, үөрэттэрэн билигин элбэх сиэн  эбээтэ, эһээтэ буолан олороллор.

Альбина Николаевна элбэх оҕолооҕун таһынан активнай общественник, комсомольскай үлэҕэ элбэх тэрээһиннэргэ, субуотунньуктарга кыттыбатах үлэтэ суох. Дьахталлар сэбиэттэрин, профсоюз, табаарыстыы суут  үлэтигэр барытыгар инники сылдьар. Хачыкаат олохтоох Сэбиэтигэрхас да төгүл дьокутаатынан талыллан быыбардааччыларын иннигэр бэйэтин харыстаммакка үлэлээбит кэмнэрин күндүтүк саныыр.

Оҕолоро бары уран тарбахтаах, айылҕаҕа чугас, кэрэни өйдүүр буола улааппыттара. Улахан уол Федот ойуччу талааннаах, илиитин дьоҕурунан  көмүс үлэтигэр кэрэ оҥоһуктары оҥорон Сахатын сиригэр  ааттанар киһи буолар. Альбина Николаевна дэриэбинэбитигэр биллэр иистэнньэҥмит. Кини тикпит сахалыы былааччыйалара, хассыаттара, аныгылыы моһуоннаах араас көстүүмэ, барыта уурбут-туппут курдук буолааччы. Кини бэйэтэ ис иһиттэн кэрэни, үчүгэйи таба көрөр киһи диэтэхпинэ сыыспатым буолуо.

Альбина олох эдэр эрдэҕиттэн велосипедынан сылдьарын сөбүлээччи. Сайын чараас булууһатын таһынан ветровката тэлээрэн Хачыкааттан  велигынан иһэрэ харахпар бу баар. Оҕолорбут кылаастарын төрөппүттэрэ, Альбина Николаевна үөлээннээхтэрэ Горохова Л.С., Кириллина Л.И., мин буоламмыт, эмиэ великпытыгар кырааскабытын, киистэлэрбитин ылан тиийэн өрөмүөннээн, кырааскалаан, испиэскэлээн кэлээччибит. Ол тухары ырыа,тойук, күлүү-салыы, көр-көрүдьүөс кэпсээннээх түгэннэри Албьинабыт көҕүлээччи.

Дьүөгэбит үлэ туйгуна, Пятилетка эдэр гвардееһа, коммунистическай үлэ ударнига бэлиэлэрдээх, Хаҥалас улууһугар оскуола иннинээҕи саастаах оҕолору сайыннарыыга, улуус социальнай-экономическай сайдыытыгар кылаатын иһин дьоһун наҕараадалаах, нэһилиэкпитигэр ытыктанар киһи. Маннык олоххо көхтөөх дьон баар буолан Кыһыл Үрүйэбит сайдар, чэчириир.

Зинаида Лазарева, хаһыат общ. корр.