Сэһэн сиэрдээх, олоҥхо олохтоох сэтинньи ыйбыт бүтэһик нэдиэлэтигэр, сылын ахсын «Кыымчаан» уһуйааммытыгар, өрөспүүбүлүкэҕэ ыытыллар Олоҥхо декадатын чэрчитинэн, олоҥхо күннэрэ ыытыллаллар.
Быйылгы үөрэх дьылыгар, фольклор куруһуогар дьарыктанар оҕолор, тугу үөрэппиттэрин, билбиттэрин саастыылаахтарын иннигэр «Олоҥхо дойдутун талааннара» концерт көрдөрөн арыйдылар. «Бөртө Боотур» олоҥхону олоҕурбут ньыманан толордулар, чабырҕахтаатылар, хомуска оонньоотулар, норуот ырыатын толордулар, үҥкүүһүттэр үҥкүүлээтилэр, саха инструменнарыгар оонньоон тыаһаттылар. Бэрт сэргэхтик ааста.
Иккис күҥҥэ «Дьулуруйар Ньургун Боотур» олоҥхону куукула театрын оҕолорго көрдөрдүбүт. «Олоҥхо оонньуулара» аралдьыйыы-дьарык ыытыллан, оҕолор сэргэхсийдилэр, үөрэ-көтө оонньоотулар. Быйылгы сылга саҥа сүүрээни бэлэмнэнии бөлөх уолаттарыгар киллэрдибит. Ол курдук, «Кыымчаан Боотур-2024» өбүгэ оонньууларыгар күрэх бэрт тыҥааһыннаахтык буолан ааста. 9 уол илин-кэлин түсүһэн, сүүрүүгэ, «Өһөс торбос» оонньууга, сыал табыытыгар, мас тардыһыытыгар, «3×1» ыстаҥаҕа уонна таас көтөҕүүтүгэр күрэхтэстилэр. Түмүккэ, Георгий Аммосов бастакы, Тургун Фёдоров иккис, Дуолан Трофимов үһүс миэстэҕэ тахсан үөрдүлэр-көттүлэр, дьиҥнээх саха боотурдарын курдук сананан кытыннылар.
Фольклор хоһугар «Олоҥхо эйгэтэ» быыстапка тэриллэн, олоҥхо күннэрин түмүктээтибит. Төрүт тылбытын көмө тыл курдук көрбөккө, сүрүн тирэх оҥостоммут, уһуйааннарга олоҥхо эйгэтин тэрийэн, оҕолорбутун ийэ тылларынан саҥардан, кэпсэтэн иитиэххэ, сайыннарыахха. Олоҥхо оҕону иитэр-үөрэтэр кыаҕа киэҥ, туһата үгүс, сайыннарар кыаҕа баһаам.
Айна Олесова, «Кыымчаан» уһуйаан эбии үөрэхтээһинин педагога, Улахан Аан с.