2024 сыл, бэс ыйын 20 күнүгэр Амма Муона чараҥар күөххэ үктэнэр үрүҥ күннүүн алтыһар Олоҥхо Үрүҥ тунах ыһыаҕа ыһылынна.
Үрүҥ күн оройго тыгыыта, Муона чараҥар 111 кырыымпаһыт аммалыы матыыптарыгар дугунан Күөх Дьөһөгөй Айыы оҕотугар сүгүрүйүү, алгыс сиэрэ—туома тутуһулунна. Дьон сүһүөхтэригэр туран илиилэрин өрө уунан нөрүөн нөргүйэн алгыс ыллылар. Түөрэхпит олордо, төлкөбүт түстэннэ, Айыы аймаҕа алгыһынан айхалланна, тоҕус сиринэн томторҕо ойуулаах чороон, сэттэ сиринэн кэрдиис ойуулаах кэриэн ымыйа кэккэлэстилэр.
Олоҥхо ыһыаҕар дьон биир саамай күүтэр—кэтэһэр, сэргээн көрөр көрүҥнэринэн саха төрүт оонньууларыгар күрэхтэһиилэр буолаллар. Спорт тоҕус көрүҥэр 23 улуустан, ол иһигэр: илин эҥэр, киин улуустартан Амматтан, Уус Алдантан, Чурапчыттан, Тааттаттан, Хаҥаластан, Горнайтан, Намтан, арҕаа улуустартан, Бүлүүттэн, Үөһээ Бүлүүттэн, Ньурбаттан, Сунтаартан, Мииринэйтэн, хоту улуустартан, Дьокуускай куораттан 250 спортсмен илин—кэлин түһүстүлэр. Үүннээн—тэһииннээн ыытааччылар көрүҥнэринэн үлэлээтилэр. Биллиилээх комментатор Александр Васильев—Көрдүгэн бэрт сэргэхтик кэпсээн—ипсээн сырдатта. Хаһыытаһа—хаһыытаһа хабырыйсыылардаах, үөгүлэһэ—үөгүлэһэ үтүрүйсүүлэрдээх, хабараан бырахсыылардаах хапсаҕайга биһиги улуус бастыҥ ыччата, хапсаҕайга “Манчаары оонньууларын-2021” муҥутуур кыайыылааҕа Даниил Иванов 75 киилэттэн үөһээ муҥутуур күрэххэ иккис буолла. “Манчаары оонньуулара-2021” атах оонньуутугар дьахталларга абсолютнай чөмпүйүөн, Хаҥалас бастыҥа Валерия Олесова муҥутуур кыайыылааҕынан таҕыста.
Олоҥхо ыһыаҕын спортивнай дьаһала, күөн-күрэһэ умнуллубат өйдөбүлү хааллардылар.
Василий МОЖУКОВ.