Күндү үөрэнээччилэрбитин, кэллиэгэлэрбин, араас сыллааҕы выпускниктары, үлэлээн ааспыт бэтэрээннэри Тиит Арыы орто оскуолата төрүттэммитэ 125 сылын бэлиэтиир өрөгөйдөөх үбүлүөйүнэн итиитик-истиҥник эҕэрдэлиибин!
Биһиги оскуолабыт 1993 сылтан учуонай, этнограф, фольклорист уонна историк Гавриил Васильевич Ксенофонтов аатын сүгэр. Быйыл Г.В. Ксенофонтов төрөөбүтэ 135 сыла, онон биһиэхэ икки бүк үөрүүлээх, долгутуулаах сыл буолар.
Тиит Арыы оскуолата Хаҥалас улууһун кырдьаҕас оскуолаларыттан биирдэстэрэ. Биһиги оскуолабытыттан үгүс элбэх үтүө-мааны дьон үүнэн-сайдан тахсаннар, дойдуларын аатын ааттата сылдьаллар.
Оскуолабытыгар сыл аайы, үөрэх дьылын түмүктүүр тэрээһиҥҥэ, бастыҥтан бастыҥ үөрэнээччилэрбитин чиэстиир үтүө үгэстээхпит. Онно биир дойдулаахтарбыт, үөрэҕирии меценнаттара олохтообут бириэмийэлэрэ туттарыллар. Ол курдук, Егоровтар педагогическай династияларын төрүттээбит, педагогическай үлэ бэтэрээнэ, герой-ийэ, Тиит Арыы нэһилиэгин бочуоттаах олохтооҕо Фекла Степановна Егорова аатынан истипиэндьийэ 1999 сылтан үөрэҕэр үрдүк ситиһиилээх, оскуола, нэһилиэк общественнай олоҕор көхтөөх үөрэнээччигэ туттарыллар.
Педагогическай үлэ бэтэрээннэрэ, Учууталлар учууталлара, оскуолабыт түмэлин тэрийбит ытык дьоммут Тамара Степановна уонна Роберт Николаевич Кузьминнар дьиэ кэргэннэрин истипиэндьийэтэ 2002 сылтан Чкаловтан төрдүлээх бастыҥ выпускниктарга туттарыллар.
2003 сылтан Хаҥалас улууһун, Тиит Арыы нэһилиэгин бочуоттаах олохтооҕо, Россия дипломаттарын Ассоциациятын чилиэнэ, СӨ норуот хаһаайыстыбатын үтүөлээх үлэһитэ Иван Васильев Рожин аатынан бириэмийэ олохтоммута. Бу бириэмийэнэн омук тылыгар кэккэ ситиһиилэммит үөрэнээччилэр наҕараадаланаллар.
2003 сылтан чинчийэр үлэҕэ ситиһиилээх үөрэнээччилэр СӨ үтүөлээх учуутала, Хаҥалас улууһун бочуоттаах олохтооҕо, “Бочуот знага” уордьан кавалера Зоя Ивановна Ксенофонтова бириэмийэтин туталлар.
2004 сылтан Биир кэлим эксээмэҥҥэ бастыҥ түмүктээх үөрэнээччигэ анаан, выпускникпыт, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ Любовь Федоровна Винокурова бэйэтин бириэмийэтин туттарар.
2008 сылга хас да бириэмийэ олохтоммутуттан биирдэстэрин РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна Елена Евгеньевна Наумова «Киhи киhитэ буол» бириэмийэни начаалынай кылаас бастыҥ үөрэнээччилэригэр туттарар.
1973 сыллааҕы Тиит Арыы орто оскуолатын выпускниктара Тиит Арыыттан, Тумултан, Чкаловтан төрдүлээх бастыҥ үөрэнээччилэргэ анаан бириэмийэ олохтообуттара. Бу сылтан саҕалаан, эмиэ оскуолабыт выпускниктара, урбаанньыт дьиэ кэргэн Елена Ефимовна уонна Рейн Михайлович Максимовтар бэйэлэрин истипиэндьийэлэрин Тумултан төрдүлээх бастыҥ үөрэнээччилэргэ туттараллар.
2013 сылтан өссө биир ытык дьоммут, педагогическай дьиэ кэргэн Ивановтар – 1963-2005 сс. бибилэтиэкэр-педагогунан үлэлээбит, РФ норуот үөрэҕириитин туйгуна Нина Ивановна, 1987-2007 сс. Тиит Арыы оскуолатын салайбыт, СӨ үөрэҕириитин туйгуна, Учууталлар учууталлара Николай Семенович ааттарынан бириэмийэнэн спортсмен-үөрэнээччилэр наҕараадаланаллар.
Бу курдук биллэр-көстөр ытык дьоммут, биир дойдулаахтарбыт оҕолору үөрэххэ-билиигэ көҕүлүүллэрэ олус махталлаах. Выпускниктарбыт араас хайысхаҕа ситиһиилэрэ оскуолабыт, нэһилиэкпит аатын ааттатар. Быйыл биир дойдулаахпыт Раиса Михайлова-Тимофеева — саха суруйааччыларын сойууһун чилиэнэ буола үүннэ. Инникитин даҕаны биһиги үүнэр көлүөнэ ыччаппытын үрдүккэ кынаттыыр ситиһиилэр үксүү турдуннар!
Оскуолабыт бары үлэһит-тэригэр, өр сылларга сыраларын ууран туран үлэлээбит бэтэрээн учууталларбытыгар, араас кэмҥэ үөрэнэн ааспыт выпускниктарбытыгар, үөрэнээччилэргэ, төрөппүттэргэ дьолу-соргуну, олоххутугар үгүс үөрүүнү, айымньылаах үлэни баҕарабын, чэгиэн-чэбдик буолуҥ! Оскуола баарын тухары — нэһилиэк сайдар кэскиллээх. Кэскилбит кэҥээтин!
Эльвира Абрамова, оскуола дириэктэрэ.