Редакция пресс-туура
Редакциянан Тиит Эбэҕэ пресс-туурунан сылдьаммыт П.С. Скрябин аатынан 1-кы Дьөппөн орто оскуолатыгар таарыйдыбыт. 2023 сыллаахха федеральнай бырагырааманан хапытаалынай өрөмүөннэниллибит оскуолаҕа билигин 73 оҕо үөрэнэр эбит. Биһигини дириэктэри иитэр үлэҕэ солбуйааччы Варвара Валерьевна Жигалова көрсөн оскуола үлэтин-хамнаһын билиһиннэрдэ, учуутал Лена Ивановна Данилова оскуола историятын сырдатар баай матырыйааллардаах түмэлгэ экскурсиялатта.
— Оскуолабыт соторутааҕыта өрөмүөннэнэн наадалаах тэрилинэн толору хааччыллыылаах олоробут, онон үлэлииргэ-үөрэнэргэ бары усулуобуйа тэриллэн турар. Үөрэнээччилэрбит араас эйгэҕэ кэккэ ситиһиилэрдээхтэр, чуолаан, спортка. Биһиги оскуолабыт улуус таһымнаах үгэс буолбут тэрээһиннэрдээх – математикаҕа Иннокентьевскай олимпиада, Заболоцкай ааҕыылара, Скрябинскай педагогическай ааҕыылар сыл аайы, сыл көтөн ыытыллаллар, — диэн Варвара Валерьевна кылгастык кэпсээтэ.
Биһиги сырыыбыт биир соругунан бу оскуола үөрэнээччилэрин, ааспыт сылтан бэттэх саха тылын учуутала София Ивановна Прокопьева көҕүлээһининэн, хаһыаппытыгар оскуолаларын, нэһилиэктэрин сонунун тиһигин быспакка суруйар, социальнай ситимнэрбитигэр сырдатар эдэр корреспонденнары кытта көрсүһүү буолла. Барыга-бары көхтөөх 7 кылаас кыргыттарын – Айсена Борисованы уонна Санаайа Очиржапованы уруок кэмиттэн көҥүллэтэн көрсөммүт кэпсэттибит.
— Биһиги оскуолабытыгар «Импульс» диэн оҕо хамсааһынын тэрилтэтэ баар. Бу хамсааһын аатыттан сиэттэрэн «Медиапульс» диэн айар-суруйар кииннээхпит. Манна үксэ биһиги кылааспыт кыргыттара дьарыктанабыт. Үксүгэр кылааспытыгар, оскуолабытыгар буолар тэрээһин туһунан суруйабыт. Сороҕор учууталбыт биһиэхэ хайа эрэ темаҕа суруйуҥ диэн сорудах биэрээччи. Оччоҕуна хаартыскалары, видеолары учууталлартан ирдэһэн булан бэйэбит матырыйаал оҥоро үөрэнэбит, интервью бэлэмниибит. Оскуолабыт үөрэнээччилэрэ ордук спортка араас ситиһиилээхтэр. Ол курдук, былырыын Бүтүн Россиятааҕы «Президент күрэхтэригэр» кыттан кэлбиппит, улууска волейболга чемпионнарбыт, өрөспүүбүлүкэ таһымнаах күрэхтэргэ куруук кыттабыт. Научнай-практическай кэмпириэнсийэлэргэ эмиэ көхтөөх кыттыыны ылабыт. Хаһыаты оскуолабыт бибилэтиэкэтигэр ааҕааччыбыт, төрөппүттэрбит «Хаҥалас» хаһыат Телеграм-канаалыгар биһиги суруйууларбытын эмиэ ааҕаллар, — диэн кыргыттар кэпсээннээх буоллулар.
Оттон биһиги эдэр кэллиэгэлэрбитигэр суруйар үлэлэригэр тэттик сүбэлэри биэрдибит. Бэлиэтээн эттэххэ, хаһыаппытыгар суруйар эдэр корреспонденнарга анаан улуус дьаһалтата сыл аайы, Россия Бэчээтин күнүгэр, суруналыыс Афанасий Яковлев аатынан харчынан бириэмийэни туттарар үтүө үгэстээх. Бу бириэмийэ лауреаттара, «Хаҥалас» хаһыакка араас сылларга көхтөөхтүк суруйбут, куорсун анньыммыт үгүс оҕо суруналыыс идэтин баһылаан айымньылаахтык үлэлии сылдьар, сорохтор билигин бэйэлэрэ эдэр корреспонденнар куруһуоктарын салайаллар. Онон, Айсеналаах Санаайаны эмиэ суруйар дьоҕургутун тохтоппокко, инникитин да хото айыҥ-тутуҥ диэн ыҥырабыт.
Видео:
Ольга Гермогенова.