Оскуолабытыгар Аһаҕас аан күнэ буолла

1-кы Дьөппөннөөҕү санаторнай оскуола-интэринээккэ Ил Дархан Айсен Николаев уурааҕынан биллэриллибит Оҕо аймах сылыгар, Хаҥалас улууһугар үөрэхтээһин тэриллибитэ 150 сылыгар анаан «Ай-Самартай» диэн Аһаҕас аан күнэ буолла.

Тэрээһиммитигэр Хаҥалас улууһун үөрэҕириитин салалтатын начаалынньыга Павел Аргунов, испэсэлиис Вероника Быганова, Оҕо эбии үөрэхтээһинин киинин дириэктэрин э.т. Наталья Шадрина, улуустааҕы «Движение первых» хамсааһын куратора Мария Саввинова, өрөспүүбүлүкэтээҕи оҕо уопсастыбатын холбоһуктарын сойууһун бэрэссэдээтэлэ Геннадий Охлопков, «Стимул» оҕо социальнай бырайыактарын өйүүр уопсастыбаннай тэрилтэ салайааччыта, «Виктория» сайыҥҥы лааҕыр сэбиэдиссэйэ Татьяна Тырылгина, илин эҥэр оскуола учууталлара, үөрэнээччилэр кыттыыны ыллылар.

Бастаан оскуола иһинэн ыытыллар араас хайысхалаах үлэлэрбититтэн быһа тардан видео көрдөрдүбүт. Эҕэрдэ тылы дириэктэрбит Марина Ли эттэ, «Долгураҥ» ансаамбыл үҥкүүнэн, 2-с Дьөппөн орто оскуолатын үөрэнээччилэрин этно-бөлөҕө (салайааччы Галина Иванова) сонун нүөмэрдэринэн ыалдьыттары эҕэрдэлээтилэр. Бу кэннэ маастар-кылаастарга тарҕаһан дьарыктанныбыт. Мин Хачыкаат орто оскуолатын учуутала Дайаана Егорова «Норуот ырыатын толоруу ньымалара» диэн маастар-кылааһыгар дьарыктанным. Кини хас биирдиибитин ураты турукка киллэрдэ, ырыа ыллатта. Дайаана Олеговна «Дьиэрэй» ансаамбыл тэрийэн үлэтин саҕалаабыт, оҕолору норуот ырыатыгар, чабырҕахха эрчийэр эбит.

Игорь Филиппов, спорт маастара, Россия үс төгүллээх чемпиона, Манчаары оонньууларын призера, Хачыкаат орто оскуолатын физкультура учуутала мас тардыһыытыгар оҕолорго маастар-кылаас көрдөрдө. Кыһыл Үрүйэ оскуолатын музыка учуутала Вячеслав Герасимов «Музыка – барыбытыгар” бырайыак чэрчитинэн ыыппыт дьарыга оҕолор интэриэстэрин тарта.

1-кы Дьөппөн орто оскуолатын эбии үөрэхтээһин учуутала Мария Филиппова дьарыгар оҕолор кумааҕынан кыыллары оҥордулар, ыйытыы бөҕөтүн биэрдилэр, бары дьиэлэригэр эмиэ оҥоруох буоллулар.
Бэйэбит оскуолабыт педагогтара «Ай-Астаа», «Ай-Оҥор» эбии үөрэхтээһин куруһуоктарын, «Хотой» байыаннай-патриотическай кулууп туһунан сиһилии кэпсээтилэр. Учууталлар, төрөппүттэр кыттыылаах төгүрүк остуолга Геннадий Охлопков аныгы оҕону иитии туһунан кэпсээтэ, Татьяна Тырылгина «Навигатор успеха» бырайыагы сырдатта.

Ыалдьыттарбытын повардарбыт минньигэс аһынан аһаттылар. Тэрээһиммитигэр көхтөөхтүк кыттыбыт дьоммутугар махталбытын тиэрдэбит.

Анастасия Мордовская, 1-кы Дьөппөннөөҕү санаторнай оскуола-интэринээт «Ай-Алтыс» куруһуогун салайааччыта.