Биһиги оскуолабытыгар ытыктыыр математик учууталларбыт Евдокия Николаевна уонна Семен Игнатьевич Иннокентьевтар ааттарынан 16-с төгүлүн, үгэс буолбут олимпиада буолан ааста. Олимпиаданы үөрүүлээхтик арыйыыга дириэктэри үөрэх чааһыгар солбуйааччы Лена Петровна Ефремова эҕэрдэлээтэ, Иннокентьевтар дьиэ кэргэннэрин аатыттан оскуолабыт выпускнига, “Улууска үөрэҕирии сайдыытыгар үтүөтүн иһин” бэлиэ хаһаайына Юрий Семенович Иннокентьев тыл эттэ, кыттааччыларга ситиһиини баҕарда. 4-с кылаас үөрэнээччитэ Анжелика Теплоухова кэрэ ырыатын анаата. Үөрүүлээх чааһы оскуолабыт психолога Виктория Николаевна Федорова иилээн-саҕалаан ыытта.
Бу олимпиадаҕа 5-7 кылааска диэри 7 оскуолаттан 43 оҕо кытынна. Биһиги кылаастан мин, Скрябина Сандаара, Дягилев Андрей кытынныбыт. Төһө да миэстэлэспэтэрбит, олимпиадаҕа кыттан астынныбыт. Бэрт интэриэһинэй, киһини толкуйдатар логическай сорудахтары толордубут. 5-с кылаастарбыт маладьыастар! Ол курдук, Алексеев Ратмир бастаата, оттон Маркова Айыына 3 миэстэ буолан үөртүлэр. Уопсай ахсаанынан Уулаах Аан оскуолата бастаата, Кылаан Чыпчаал кыайыылаахтара буоллулар! Иннокентьевтар кубоктара бу оскуолаҕа барда. Эһиил көрсүөххэ диэри!
Айсена Борисова, 1-кы Дьөппөн орто оскуолатын 7 кылааһын үөрэнээччитэ. МедиаКиин.