Оскуолабытыгар бэрт сэргэх тэрээһин — Олоҥхо күнэ буолла. Бары сахалыы таҥастаах кэлбиппит көрүөххэ кэрэтэ сүр! Саха тылын учууталлара Лена Ивановна Данилова уонна София Ивановна Прокопьева олоҥхо туһунан сырдатан кэпсээтилэр. Уруок быыһыгар, сынньалаҥ кэмигэр оскуолабыт выпускнига Мичил Федоров « Мүлдьү Бөҕө» олоҥхону толорбут видеоролигын көрдүбүт- иһиттибит. 6-с кылаас үөрэнээччилэрэ Элина Теплоухова, Тима Адамов, Вася Адамов алын кылаас оҕолоругар «Айыы Дьураҕастайы» олоҥхолоон иһитиннэрдилэр. Кыралар бэркэ сэҥээрэн олорон иһиттилэр.
Уруоктар кэннилэриттэн аактабай саалаҕа мустаммыт 3 кылаас үөрэнээччитэ Саша Сырмятников уонна 11 кылаас үөрэнээччилэрин толорууларыгар олус интэриэһинэй ис хоһоонноох олоҥхолору истэммит сүргэбит көтөҕүлүннэ. Саша артыыстыы туттан- хаптан тойуктуура киһини эрэ сөхтөрөр. Ол кэнниттэн уус тыллаах, “Күн эргиирэ” диэн өрөспүүбүлүкэтээҕи оһуокай күрэһин кыттыылааҕа Амелия Яковлева оһуокай таһаарда, бары киирэн өбүгэбит үҥкүүтүн үөрэ-көтө үҥкүүлээтибит. Биһиги, «Медиапульс» чилиэннэрэ, олоҥхоҕо аналлаах хаһыат оҥорон ыйаатыбыт. Ити курдук олус тэрээһиннээхтик, интэриэһинэйдик Олоҥхо күнүн сүргэбит көтөҕүллэн туран атаардыбыт.
Санаайа Очиржапова, П.С. Скрябин аатынан 1-кы Дьөппөн орто оскуолатын 7 кылааһын үөрэнээччитэ, Медиакиин.