Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сылларыгар
1989 сыллаахха олунньу 15 күнүгэр Сэбиэскэй Сойуус Сэбилэниилээх күүстэрин, Афганистан Демократическай Өрөспүүбүлүкэтиттэн таһаарыы түмүктэммитэ. Бу күн модун Россияҕа буойун интернационалистар күннэринэн бэлиэтэнэр.
Биһиги биир дойдулаахтарбыт, II Малдьаҕар нэһилиэгин чулуу дьоно: Афганистан сэриитин кыттыылааҕа, байыаннай сулууспа бэтэрээнэ, офицер-летчик Николай Самсонов, Анал байыаннай дьайыы бэтэрээнэ, Донбасска бэйэлэрин баҕа өттүлэринэн баран кыттыбыт дьон Сойуустарын эрэгийиэннээҕи салаатын салайааччыта Аркадий Пудов уонна Анал байыаннай дьайыы бэтэрээнэ, кикбоксиҥҥа СНГ үтүөлээх тириэньэрэ, «Саха Боотур» байыаннай-спортивнай бэлэмнэнии уонна патриотическай иитии Киинин салайааччыта Андрей Артамонов өйдөбүнньүк күн чэрчитинэн «Хорсун быһыы уруогун» Дьокуускай куорат, «Айар Уустар» креативнай индустрия коллеһын устудьуоннарыгар ыыттылар. Олоххо сыһыан, дойдуга бэриниилээх буолуу, патриотизм тыыныгар иитиллии, историческай өйдөбүнньүктэр уонна көлүөнэттэн көлүөнэҕэ удьуор утум туһунан уруок сүрүн кэпсэтиитинэн буолла. Уруок түмүктэниитэ «Патриот» өрөспүүбүлүкэтээҕи күрэхтэһии финалистара, «Торнадо» хамаанда чилиэннэрэ көрдөрүүлээх маастар-кылаас ыыттылар.
«Хорсун быһыы уруога» бу улаатан эрэр оҕолорго, дойдубут историятын билэргэ, убаастыырга, кини ситиһиилэринэн киэн туттарга уонна өрөспүүбүлүкэбит, модун Россиябыт дьоһуннаах дьонноро буолалларыгар олук уурдубут. Аҕа дойдуга бэриниилээх буолуу тыыныгар иитэбит», -диэтэ салайааччы Андрей Артамонов.
Манна даҕатан эттэххэ, Андрей Артамонов патриотическай иитии тиһигин сайыннаран, чөл олоҕу тутуһууну тарҕатыыга, уолаттары Ийэ дойдуну таптыырга үөрэтиигэ ситими быспакка үлэлэһэр.
Уйбаан УЙГУУРАП,
Хаартыскалар Андрей Артамонов архыыбыттан туһанылыннылар.