Оройуоннааҕы кииннэммит бибилэтиэкэ аактабай саалатыгар улуус саха тылын учууталларын, бибилэтиэкэрдэрин, общественниктарын, култуура үлэһиттэрин кытта СӨ Ил Дарханын уонна Бырабыытылыстыбатын дьаһалтатын Тыл сайдыытын боппуруостарын сүрүннүүр управление салайааччыта Римма Жиркова кыттыылаах лекторий-кэпсэтии буолла.
Тэрээһиҥҥэ улуус аҕа баһылыга Олег Иринеев, 2-с Дьөппөн нэһилиэгин баһылыга Александр Константинов, Дьэр нэһилиэгин баһылыга Егор Исаков, култуураҕа уонна духуобунай сайдыыга управление салайааччыта Сергей Павлов кыттыыны ыллылар.
Римма Романовна саха тылын билиҥҥи туругун, судаарыстыбаннай тыллар сайдыыларыгар туох үлэ ыытылларын сырдатта. Олус дириҥ суолталаах, ис хоһоонноох ирэ-хоро кэпсэтии таҕыста.
Күн иккис аҥарыгар Хаҥалас улууһугар сир-дойду, күөллэр-үрэхтэр ааттарын түмүүгэ үлэ хаамыытын билистибит. Манна үлэ үгэнигэр үөскээбит ыарахаттары туоратарга быһаарыылар ылылыннылар. Даҕатан эттэххэ, сирдэр ааттарын сахалыыттан нууччалыы тылбааска кэккэ мөккүөрдэр үөскүүллэр. Онуоха Тыл сайдыытын боппуруостарын сүрүннүүр управление салайааччыта Римма Романовна анал идэлээх испэсэлиистэри сыһыаран үлэ хаамыыта түргэтииригэр күүс-көмө буолуохпут диэтэ. Тус бэйэбит киниэхэ өйөбүлүн иһин махталбытын тиэрдэбит.
Мунньах быһаарыытынан үлэ түмүктэнэр күнэ-дьыла быһаарылынна, сорудахтар бэрилиннилэр.
Сахая Потапова, улуус култуураҕа уонна духуобунай сайдыыга управлениетын сүрүннүүр испэсэлииһэ.