#Эркээни ыһыаҕа – 2024
Орто Дойду туонатыгар Эркээни ыһыаҕа ыһыллар күнэ үүннэ. Быйылгы ыһыах Россияҕа Дьиэ кэргэн, Саха сиригэр Оҕо аймах уонна Хаҥалас улууһугар Дьиэ кэргэн уонна оҕо саас сылларыгар итиэннэ улууска Үөрэҕирии ситимэ төрүттэммитэ 150 сылыгар ананар.
Ыһыах күн араас түһүлгэлэринэн тэрээһиннэр буолаллар, күрэстэр ыытыллаллар, быыстапкалар тураллар. Ол курдук, «Үс Моҕол ураһа» түһүлгэтигэр «Саха сиригэр дьиэ кэргэн тутулун сайыннарар институтугар М.Е. Николаев оруола» анал кинигэ быыстапката, «Түмэл түһүлгэтэ» дьиэ кэргэн үйэлээх малларын күрэх-быыстапката тэриллиэ.
«Оһуокай түһүлгэтигэр» Дархан этээччи Тимофей Давыдов кэриэһигэр оһуокай этээччилэр күрэстэрэ, “Тойук Тоҕойугар” олоҥхону толорууга күрэс, Михаил Федоров-Ырыа Миисэ төрөөбүтэ 95 сылыгар анаммыт норуот ырыаларын күрэһэ ыытыллыа.
Хайа да ыһыах спортивнай күрэхтэһиитэ суох ааспат – хапсаҕайга, сахалыы многоборьеҕа, атах оонньууларыгар күрэх тэриллиэ.
Хаҥалас улууһун аҕаларын түмсүүтэ эр дьон уруһуйунан дьүһүйүүлэрин быыстапкатын, анал байыаннай дьайыы кыттыылаахтарын кытта көрсүһүү, эр дьон оһуокайын тэрийэн ыытыахтара.
Киэһэ өттүгэр элбэх оҕолоох дьиэ кэргэттэр көрүү-күрэстэрэ уонна эдэр ыччат кэнсиэрэ буолуо. Кэлиҥ, сылдьыҥ, сынньаныҥ!
Ольга Гермогенова.