Покровскай 3-с №-дээх оскуолатыгар Хаҥаластааҕы баһаарынай чаас сэрэтэр үлэҕэ инструктордара Михаил Михайлов уонна Денис Корнев оскуола үлэһиттэрин кытта «Сэрэхтээх дьиэ кэргэн» диэн төрөппүт уонна оҕо кыттыылаах комплекснай баһаарынай эстафета ыыттылар. Тэрээһин саҕаланыыта баһаарынай чаас инструктора, өрөспүүбүлүкэ бу көрүҥҥэ чөмпүйүөнэ Михаил Михайлов бойобуой баһаарынай таҥаһы кэтэн көрдөрдө.
Бастакы түһүмэххэ төрөппүттэр уонна оҕолор 10-нуу мүнүүтэҕэ квиз-тест толордулар. Сэрэхтээх тэриллэри булууга ким сытыы өйө, мындыра быһаарылынна. Салгыы төрөппүттэр бойобуой баһаарынай таҥаһы түргэнник кэтииргэ куоталастылар. Түмүккэ комплекснай баһаарынай эстафетаҕа илин-кэлин түстүлэр. Барыта 8 хамаанда — 3-4 кылаас үөрэнээччилэрэ төрөппүттэринээн кытыннылар. Кыайыылаахтар мэтээллэринэн, араас бириистэринэн наҕараадаланнылар.
Ол курдук, 1 миэстэни Алексей Явкин кыыһа Валялыын (4б кылаас), 2-с миэстэ — Оксана Лебеденко уола Константинныын (4а кылаас) уонна 3 миэстэни Михаил Божок кыыһа Эмилиялыын (4а кылаас) ылан үөрдүлэр-көттүлэр. Оҕолор ханна да сырытталлар, уоттан- баһаартан сэрэхтээх буолалларыгар үчүгэй тэрээһин буолла.
Уйбаан Уйгуурап.