Уот сэрии ортотунан
Кытыл Дьураҕа Берлини ылыы иһин кыргыҺыыларга кыттыбыт Владимиров Степан Семенович—Лабыр Ыстапаан олорбута. Кинини өссө Рейхстаг үрдүгэр кыҺыл былааҕы анньыбыт курдук кэпсииллэрэ. Алта уонус сылларга Кыайыы күнүгэр бу Степан курдук уоттаах сэриигэ сылдьыбыт эрэ дьону чиэстээн—бочуоттаан ахтар буолаллара. Японияны утары кыргыһыыларга эмиэ өлөр—тиллэр икки ардыгар сэриилэспиттэр, армияҕа ыҥырыллан баран аты көрүүгэ эҥин сулууспалаабыттар умнууга хаалаллара. Владимиров Степан Семенович Дьэкэмдэҕэ 1901 сыллаахха төрөөбүт киһи. Билигин Кытыл Дьураҕа аймахтара бааллар. Бүгүн учуутал Егор Алексеевич Жирков буойун туһунан 70-с сылларга суруйан хаалларбытын билиһиннэрэбит.
Аҕа дойду 1941-1945 сс. сэриитигэр немец—фашист талабырдьыттарын утары сэриигэ Кытыл Дьура сэлиэнньэтиттэн бэрт үгүс киһи Сэбиэскэй Армия кэккэтигэр ыҥырыллыбыта. Кинилэр ортолоругар колхозтаах Владимиров Степан Семенович баара. Кини1943 с. бэс ыйын 10 күнүгэр ыҥырыллыбыта.
Бурятияҕа икки ыйга бэлэмнэнии куурсун барбыта, онтон соҕуруу Керчь куоракка тиийэн бастакы бойобуой сүрэхтэниитин ылбыта. Манна икки ый устата хабыр кыргыһыыга сылдьыбыта. Онтон уодаһыннаах өстөөҕү чугутан, салгыы Севастополь куораты босхолооһуҥҥа сылдьыспыта. Манна ый аҥара кыргыһан баран, тус арҕаа барсыбыта.
Кини сулууспалыыр Украинскай фрона күнтэн—күн килбиэннээх кыайыылары ситиһэн испитэ. Фронт Польша кыраныыссатыгар тиийэн тохтообута. Икки өттүттэн кырыктаах кыргыҺыылар саҕаламмыттара. Бэрт үгүс—элбэх сүтүк тахсыбыта.
Степан Семенович сулууспалыыр ротатыгар араас омук бэрэстэбиитэллэрэ бааллара. Кинилэр бука бары биир киҺи курдук өстөөҕү утары кыргыспыттара. Биир кыргыһыыга рядовой Владимиров уһулуччулаах хорсун быһыыны көрдөрбүтэ. Ол курдук, быстах чугуйуу кэмигэр хаалларыллыбыт пулемету тобурах буулдьа ортотунан бэйэтин дьонугар соһон таһааран, ротата салгыы охсуҺар кыаҕын хааччыйбыта.
Хорсун саллаат Владимиров кырыктаах сэриини өстөөх арҕаҕар тиийэн түмүктээбитэ.
Владимиров С.С. төрөөбүт дойдутугар, дьонугар—сэргэтигэр кыайыы өрөгөйдөөх үөрүүтүнэн толору туолан, түөһүгэр биэс правительственнай наҕараадалаах — «Хорсунун иһин«, «Варшаваны ылыы иһин«, «Берлини ылыы иһин«, о.д.а. мэтээллэри иилинэн этэҥҥэ эргиллэн кэлбитэ.
Билигин кини колхоз производствотыгар актыыбынайдык үлэлии—хамсыы сылдьар.
Егор ЖИРКОВ.
(Редакция архыыбыттан)