Сиинэ волонтердара көмөҕө бэлэмнэр

Бары бииргэ

Саҥа дьыллааҕы сүпсүлгэн бүтээтин кытта нэһилиэктэргэ волонтердарбыт үлэлэрэ салҕанан барда. Бу күннэргэ Сиинэ нэһилиэгин дьахталларын сэбиэтигэр саллааттар сылаас үтүлүккэ наадыйабыт диэн илдьит ыыппыттар. Онон түмсүү чилиэннэрэ аны үтүлүк тигиитигэр түһүнэргэ соруммуттар. Бу туһунан дьхталлар сэбиэттэрин салайар Ульяна Степанова иһитиннэрдэ.

— Биһиги маннык илдьити тутаат, иһитиннэрии таһааран, Сиинэ олохтоохторо бэрт кылгас бириэмэ иһигэр, ким да туора турбакка, хотуобай үтүлүк, бэрчээкки хомуйан, баһыылка оҥоро охсоммут Дьокуускай куоракка баар «Боевые шелкопряды Якутии» общественнай хамсааһыҥҥа ыыттыбыт. Ол курдук, уопсайа эрэһиинэ ытыстаах 31 паара, чараас 44 паара, 21 паара халыҥ уонна бөҕө матырыйаалтан 15 паара бэрчээккини, 3 паара истээх үтүлүгү дьоммут хомуйан тиксэрдилэр. Көмөҕө кыттыспыт нэһилиэкпит олохтоохторугар махталбытын биллэрэбит. Бу күннэргэ эмиэ иккис баартыйа хомуллуо. Ийэлэр, эбээлэр матырыйаал булларбыт уруккулуу ватин истээх, халыҥ соҕус таҥаһынан бүрүйэн үтүлүк тигиэххэ диэн биир сүбэнэн быһаарынныбыт, — диэн Ульяна кылгастык кэпсээтэ.

Ольга Гермогенова.