Кыстыгы көрсө
Сиинэҕэ култуура-спорт комплекска кыһынын тымныы буолар. Онон быйыл сайын манна «Энергосберегающие технологии» ХЭТ улахан өрөмүөн үлэтин ыыта сылдьар. Бу уонна кыстыкка бэлэмнэнии туһунан сырдата түһэригэр нэһилиэк баһылыга Айдан Леверьевтан көрдөстүм.
— Эньиэргийэни харыстааһын бырагырааматынан туһааннаах тэрилтэни кытары сэттэ сыллаах хантараак чэрчитинэн Сынньалаҥ-спорт киинигэр улахан өрөмүөн бара турар, — кэпсиир Айдан Никифорович. – Бэриллэр сылааһы тутар, дьиэни сылытар инниттэн үлэ тэриллэр. Анал матырыйаалынан дьиэни ис өттүттэн үрдүлүүнү ыстаран баран бүрүйэн ыраатыннардылар. Ититэр тиһик эҥин эбиллибит. Муостата кытары утеплителлэнэр. Аан, түннүк оҥоһулунна. Оскуола тэлгэһэтигэр баар урукку дьоҕус куорпуһу өрөмүөннэтэ сылдьабыт. Кыһын бу КСК-ҕа бибилэтиэкэ, дьаһалта үлэлээбитэ. Дьэ туспа дьиэҕэ көһөр инибит. Ити куорпуска өссө почтабыт көһөр (урукку дьиэтэ олус эргэрдэ).
— Хочуолунайгыт ону кыайар дуо? – ыйытабын.
— Оскуола хочуолунайыттан сылаас кэлэр кыамтатын улаатыннаран тураллар.
— Киин ититиигэ биир эмэ ыал дьиэтэ хабыллар дуо?
— Быйыл кыах суох, үс эрэ ыал холбонуохтаах. Турбаны кыайан уйумматыбыт, эһиилгигэ бэлэмнэниэхпит. Оскуола 77 оҕолоох, оҕо уһуйааныгар (оскуола аҥар крылотыгар олохсуйбуттара) 40 кырачаан сылдьар. Оҕо аҕыйыыр, аанньа суола-ииһэ суох сир, дойдум барахсан. Балыыһабыт бырааһа суох. Улуус балыыһатын салалтатыттан Артур Павлович Протодьяконов саҥа массыына биэриэх буолтун кэтэһэбит. Олорорго Сиинэ ыарахаттардаах даҕаны, санаабытын түһэрбэппит. Кыстыгы көрсө социальнай эбийиэктэрбит өрөмүөннэнэн бүтүөхтэрэ.
— Махтал!
Людмила Аммосова.