Сиинэ нэһилиэгэр спорду көҕүлээччи, учуутал, тренер Василий Асекритов кэриэһигэр волейболга аһаҕас турнир буолла.
Бу күрэхтэһии олунньу 29 күнүгэр, Василий Данилович төрөөбүт күнүгэр, түөрт сыл буола-буола тэриллэр. Быйылгы күрэхтэһиигэ 15 хамаанда кэлэн кытынна. Ол курдук Верхоянскай, Марха, Дьокуускай, Хаҥалас нэһилиэктэрин хамаандалара сытыы киирсиилээх оонньууну көрдөрдүлэр. Күрэхтэһии тэрийээччилэринэн Хаҥалас улууһун физкультураҕа уонна спортка отдела, Сиинэ нэһилиэгин дьаһалтата уонна Василий Данилович чугас аймахтара, кыргыттара, табаарыстара, бииргэ үлэлээбит кэллиэгэлэрэ, истиҥ доҕотторо буолаллар.
Икки күннээх волейбол икки спортивнай сааланан ыытылынна: кыргыттар оскуолаҕа, уолаттар култуура киинигэр оонньоотулар. Күрэҕи кылаабынай судьуйа Айсен Гоголев иилээн-саҕалаан ыытта.
«Ким күүстээх, бэлэмнээх, ол хамаанда кыайар» диэн этиинэн салайтаран күрэхтэһии олус тэрээһиннээхтик, интэриэһинэйдик, үрдүк таһымҥа ааста. Түмүккэ уолаттарга Улахан Аан хамаандата тэҥнээҕин булбата, 2 миэстэ хаһаайыттар сиинэлэр буоллулар уонна
3 миэстэни Покровскай куорат хамаандата ылла. Оттон кыргыттарга ыраахтан кэлбит ыалдьыттар — Верхоянскай улууһун хамаандата бастаата, Дьокуускай куорат хамаандата иккис, соҕуруу нэһилиэктэр хамаандалара үһүс миэстэ буоллулар. Кыайыылаах хамаандаларга Кубок, грамота, мэтээл уонна сыаналаах бириис туттарылынна. Ону таһынан Василий Данилович бииргэ үөрэммит доҕотторо, аймахтара, үөрэппит оҕолоро биирдиилээн оонньооччуларга эмиэ анал бириистэри туруордулар.
Ульяна Степанова, Сиинэ.