Сиинэҕэ нэһилиэнньэ 231 төбө сүөһүлээх (ол иһигэр 73 ыанар ынах), 440 сылгылаах (268 биэ). Манна биир тэрээһиннээх хаһаайыстыба баар, Дмитрий Климовскай салайар. Кини 12 ынахтаах, барыта 38 төбө сүөһүнү кыстатаары сылдьар, ол иһигэр быйылгы ньирэйэ – 8.
Сиинэлэр окко былааны толорон эрэллэр. Арыы сирдэргэ оттуур буолан син үлэ тахсыылаах.
— Климовскайдаах 39 туонна оттоннулар, биирдиилээн хаһаайыстыбалар былааннара 684 туонна, онтон 512-кэтин чөкөтүлүннэ, — от үлэтин хаамыытын билиһиннэрдэ тыа хаһаайыстыбатын боппуруостарыгар олохтоох дьаһалта исписэлииһэ Екатерина Прохорова. — Дьон кыттыһан оттууллар. Ол курдук, Иннокентий Самойлов уонна Максим Шадрин уолаттара улаатан көмө дьон буоллулар. Урукку сылларга кинилэр атыыга эмиэ оттууллар этэ. Хомойуох иһин, быйыл отторо атыыга барбатаҕа…
Олус бэркэ уопуттаах отчут Владимир Ильич Якушев кыыһынаан Еленалыын оттоотулар. Кураан күннэри баттаһан сиинэлэр кыһыҥҥыга бэлэмнэннилэр. Анал байыаннай дьайыыга сылдьар икки уолаттарбыт сүөһү тутар дьонноругар дьаһалта оттуулларыгар уматык биэрэн көмөлөстө. Оттон бурдугунан дьарыктанааччы биһиэхэ суох, — диэтэ Екатерина Макаровна.
Людмила Аммосова.