«Кэлэр кэскилгитин айыҥ, сырдыкка тардыһыҥ, бэйэ-бэйэҕитигэр көмөлөһө-көмөлөһө саҥаны арыйыҥ уонна ону инникибит, аан дойду кэскилин туһугар туһаныҥ!» диэн эппиттээх 2019 сыллаахха М.Е. Николаев «Познавать, чтобы созидать: от физико-математических олимпиад до Всеазиатской физической олимпиады» диэн кинигэтигэр.
«Музыка барыбытыгар» диэн Саха Өрөспүүбүлүкэтин Бастакы президенэ Михаил Николаев көҕүлээбит уонна атаҕар туруутугар күүс—көмө буолбут бырайыага киэҥ далааһыннанар. Покровскайдааҕы искусство оскуолата оҕо талаанын, билиигэ—көрүүгэ дьулуһуутун бу сылларга сайыннаран кэллэ. Үөрэнээччилэрбит билигин ситиһиилэринэн үөрдэллэр.
Дьаныардаах Василий Сергеев
Ол курдук, искусствоҕа дьоҕурдаах оҕолорбутугар сайдалларыгар усулуобуйа тэриллэн арылланнар араас улахан куонкурустарга ситиһиилээхтик кыттар буоллулар. Оскуолабытыгар алтыс кылааска үөрэнэр Василий Сергеев талааннаах преподавательгэ, биһиги выпускникпытыгар Евгений Баишевка дьарыктанан үөрэнэн өрөспүүбүлүкэтээҕи куонкурустартан саҕалаан бүтүн аан дойдутааҕы күрэхтэргэ ситиһиилээхтик кыттар. Ол курдук, Василий кларнетка оонньуурга үөрэнэн «Волшебство звука» 5-с аан дойдутааҕы күрэххэ лауреат аатын ылан бастакы истиэпэннээх дипломунан бэлиэтэммитэ. «Розовая чайка» эдэр толорооччулар аан дойдутааҕы күрэхтэригэр «Оркестровые инструменты» диэн аат кыайыылааҕынан тахсыбыта. Салгыы сайдан бу уолчаан духовой инструменнарга куонкуруска бастаабыта, хамсык кэмигэр өрөспүүбүлүкэбит тэйиччиттэн духовой оонньууларга күрэҕэр кыайыыламмыта, онтон ыла уонтан тахсата араас куонкурустарга лауреат аатын ылта, бириистээх миэстэлэринэн уһуйааччыларын үөрдэр-көтүтэр. Ити иһигэр «Саха сирин саҥа ааттара», «Ирбэт тоҥноох дойду музыката», «Көмүс дорҕоон», «Ситиһиигэ инникибыт диэки», «Сааскы фанфардар», «Музыкальнай мозаика» күрэстэрэ, «Музыка барыбытыгар» бырайыак тэрээһиннэрэ иитиллээччибитигэр ситиһиилэргэ алгыстаах суолу арыйан иһэллэр. Василий Сергеев 2021-2022 сылларга, Саха Автономията төрүттэммитэ 100 сылынан «Хаҥалас улууһун 100 саҥа ааттара» оҕо айар үлэтигэр уонна спортка фестивалыгар «Инструментальнай толорооччу» номинацияны ылбыта элбэҕи этэр. Үүммүт сыл уолбут Москва куоракка баран «Волшебство звука» аан дойдутааҕы куонкуруска Гран-При хаһаайына буолан кэллэ. Биллэн турар, бу барыта улахан дьаныардаах үлэттэн уонна музыкаҕа бэриниилээх буолууттан тахсар.
Киэн туттар кыысчааммыт Карина Фомина
Карина Фомина, искусство оскуолатын хореографическай салаатын бэһис кылааһын үөрэнээччитэ. Эмиэ талааннаах, үлэһит кыысчаан. Кинини үҥкүүгэ Александра Кейметинова уһуйар.
Карина Саха сирин, Россия уонна аан дойду таһымнаах улахан куонкурустар кыайыылаахтара. Кини Сахая Ноговицына салайар «Дэгэрэҥ» үҥкүү ансаамбылын солистката. Аан дойдутааҕы «WEDANCE» Санкт-Петербург куоракка ыытыллар куонкуруһун үс төгүллээх лауреата буолар. Манна «Дьөһөгөй», «Хотугу таба» дуэттарга, «Якутяночканы» сыанаҕа соҕотоҕун үҥкүүлээн көрөөччүлэри сөхтөрбүтэ, маастарыстыбатынан анал ааттары ылбыта. «Звездная галактика» диэн Москваҕа ыытыллыбыт улахан фестивальга «Дэгэрэҥ» ансаамбылын кытары ситиһиилээхтик кыттыбыта, лауреат буолта, өссө дьүүллүүр сүбэ анал бирииһин биллиилээх опернай ырыаһыт Екатерина Самойленко илииттиттэн туппута умнуллубат түгэн этэ. 2022 сыллаахха Хабаровскайга ыытыллыбыт «Сыны и дочери Отечества» патриотическай куонкуруска, онтон түмүк түһүмэххэ Москва куоракка ити кэлэктиибин кытары кыайыылааҕынан аатыран дойдуларыгар эргиллибиттэрэ оҕолорбут искусствоҕа бэриниилээхтэрин туоһулуур.
Карина Фомина араас таһымнаах култуура тэрээһиннэрин үҥкүүтүнэн киэргэтэрин көрөбүт. Ол курдук, Россияҕа Педагог уонна уһуйааччы сылыгар ыытыллыбыт Эдэр талааннаахтар баалларыгар кыттыбыта уонна «Хореографическай искусство» диэн анал аатынан бэлиэтэммитэ. «Дайыы — Взлет» диэн түмэллэргэ ыытыллар искусство тэрээһиннэригэр, ол иһигэр Оҕо култуура форумугар элбэхтик кэрэ үҥкүүлэрин билиһиннэрбитэ, бэйэтэ манна араас маастар — кылаастарга дьарыктаммыта, сонун лекциялары истэн кэлтэ, тыйаатыр уонна киинэ биллиилээх артыыстарын кытары көрсүһүүлэргэ кыттыбыта.
Биһиги, Искусство оскуолатын кэлэктиибэ, үөрэнээччилэрин төрөппүттэрэ, Василий Сергеев уонна Карина Фомина ситиһиилэриттэн астынабыт, кинилэринэн киэн туттабыт, оҕолорбутугар олоххо алгыстаах айаны баҕарабыт.
Вероника Алексеева, Покровскайдааҕы Искусство оскуолатын дириэктэрэ, Саха Өрөспүүбүлүкэтин култууратын үтүөлээх үлэһитэ