Бэлиэ түгэн
Тиит Эбэҕэ «Сарыал» Култуура киинигэр сүрэхтэрин сылааһын холбоон 50 сыл бииргэ олорор дьоллоох дьиэ кэргэни — Мария Николаевна уонна Роман Романович Скороходкиннары чиэстиир үөрүүлээх тэрээһин буолла. 1975 сыл тохсунньу 9 күнүгэр харахтарынан хайҕаһан, сүрэхтэринэн сөбүлэһэн 1-кы Дьөппөн сельсоветыгар Скороходкиннар олохторун холбообуттар. Кэрэ сэбэрэлээх Мария Николаевна алын кылаас учуутала, ыал дурда-хахха киһитэ Роман Романович сопхуоска тутууга, оҕуруокка үлэлээн, ыарахантан чаҕыйбакка сынньалаҥҥа барыар диэри үлэ үөһүгэр сылдьыбыта. Кинилэр 4 оҕонү төрөтөн, үөрэхтээн улаатыннарбыт дьоллоох төрөппүттэр. Билигин эбээ-эһээ ааттарын ааттатар сиэннэр, хос сиэн бааллар.
Бэлиэ күннэринэн Скороходкиннары 1-кы Дьөппөн дьаһалтатын испэсэлииһэ Лена Ефремова эҕэрдэлээтэ, Хаҥалас улууһун, нэһилиэкпит ытык ыалларын кинигэтигэр кииллэрдэ, илии баттатта.
Истиҥ эҕэрдэ тылы олохтоох дьаһалта баһылыга Андрей Яковлев эттэ, П.С. Скрябин аатынан 1-кы Дьөппөн орто оскуолатын идэлээх сойууһун бэрэссэдээтэлэ Ньургуйаана Амбросьева, Кэндэлики түөлбэ аатыттан сыана бэтэрээнэ Матрена Скрябина, үөрэппит оҕолоро, Александр Собакин, сыана бэтэрээннэрэ Валентина Яндреева, Ольга Попова эмиэ бу күн эҕэрдэ үтүөтүн тиэртилэр.
Бу дьоллоох ийэни, аҕаны көрөн олорон киһи эрэ долгуйа үөрэр. Иэримэ дьиэни тэринэн, төрүүр оҕону төлкөлөөн, ыал буолан, үлэни өрө тутан, олох араас ыарахаттарын бииргэ ааһан, Орто дойдуга кэлбит аналларын толорон, илии илиилэриттэн тутуһан дьоллоохтук олороллоро эдэр дьоҥҥо, хас бирдиибитигэр үтүө холобур буолар. Мария Николаевна, Роман Романович оҕолорун, сиэннэрин, хос сиэннэрин тапталларыгар угуттанан, ситиһиилэринэн үөрэн өссө уһун олохтоннуннар диэн алгыспын ыытабын.
Анастасия Мордовская, Тиит Эбэ c.