Саха сиринээҕи «Дууһабытынан эдэрбит» киин «үрүҥ көмүс» волонтердара Россияҕа киэҥник биллэр хамсааһыҥҥа 2021 сыллаахха киирбитэ уонна Дьокуускайдааҕы Ю.А. Гагарин аатынан култуура киинин иһинэн көхтөөтүк үлэлэһэр.
Бу хамсааһыҥҥа Өктөм нэһилиэгин Елизавета Большакова салайааччылаах «Эркээни» түмсүүтэ былырыыҥҥыттан тэриллэн кыттыста. Ханнык баҕарар түмсүү салайааччытыттан улахан тутулуктаах буолар. Салайааччы киэҥи анааран көрөр буоллаҕына түмсүүтэ сомоҕолоһуулаах, көхтөөх буолар. Биһиги эдэр көлүөнэ ыччакка саха норуотун култууратын, өбүгэбит үгэстэрин тарҕатабыт, сиэри-туому тутуһарга үөрэтэр, салгыы үйэтитэр соруктаахпыт. Барыта 35 түмсүүнү кытта сомоҕолоһон 7 хайысханан, 20 социальнай хайысхалаах бырайыактарынан 14-с сылбытын бииргэ үлэлиибит.
Билиҥҥи дьалхааннаах кэмҥэ бэйэ-бэйэбитигэр көмөлөсүһэрбит, биир санааҕа түмсэрбит, сомоҕолоһорбут олус наадалаах. Ол курдук, бу «Эркээни» түмсүү нэһилиэк иһигэр эрэ буолбакка, өрөспүүбүлүкэ, ону ааһан, Россия хас даҕаны эригийиэннэрин кытта бииргэ үлэлэһэр. Уопатастаһан, былаан быһыытынан, интернет нөҥүө билсиһэ—көрсүһэ, кэпсэтэ олоробут. Бүтүн дойду үрдүнэн ыытыллар аһымал аахсыйаларга тиһигин быспакка көмөлөһөбүт. Онно төһүү күүһүнэн түмсүүлэрбит буолаллар. Саха сирин дэлэгээссийэтин састаабыгар киирэн былырыын Елизавета Большакова Москва куоракка «үрүҥ көмүс» волонтердар Бүтүн Россиятааҕы форумугар кыттыбыта.
«Эркээни» түмсүү байыаннай эпэрээссийэ аахсыйаларыгар, быһаччы Хабаровскай куорат икки госпиталыгар, Москва куорат перинатальнай киинигэр, дойдубутугар буолар араас айылҕа дьайыыларыгар эмсэҕэлээбиттэргэ, кыаммат-түгэммэт, инбэлиит дьоҥҥо көмөҕө көхтөөхтүк кыттыһалларын махтана бэлиэтиибин. Маннык босхо үлэҕэ ылбычча түмсүү, биирдиилээн дьон ылсыһан үлэлэспэт, араас биричиинэнэн туораан хаалар түбэлтэлэрэ баар. Инникитин түмсүүлээхтик дойдубут туһугар сырдык санаанан салайтаран, бииргэ үлэлээн, кыра да буоллар кылааппытын киллэрсэ туруоҕуҥ диэн баҕа санаабын тиэрдэбин.
Валентина Сартаева-Васильева, Саха сиринээҕи «Дууһабытынан эдэрбит» киин салайааччыта, Дьокуускай к.