Күндү биир дойдулаахтарбыт!
Эһиги иннигитигэр «Тыа сирэ – сайдыы киинэ» диэн бэрт сонуннук суруллубут, «Чулууттан чулуу дьоммут», «Сайдыы саҥа саҕахтара», «Самыртай хочотугар», «Малдьаҕардар», «Соҕуруу нэһилиэктэр, агрохайысхалаах оскуолалар» диэн улахан түһүмэхтэртэн турар саҥа кинигэ. Манна дойду тутула уларыйыытыгар улуус тыатын хаһаайыстыбатыгар бастакы бааһынай хаһаайыстыбаны тэриммит, саҕалаабыт дьон туһунан, нэһилиэктэргэ улахан хаһаайыстыбалар, бааһынай хаһаайыстыбалар, кээпэрэтииптэр араас кэмнэргэ дьоһуннаах, кэскиллээх үлэлэрэ киэҥник сырдатыллыбыт.
Кинигэни Саха Агропромышленнай комплексын Бочуоттаах үлэһитэ, Гражданскай килбиэн бэлиэ хаһаайына, үлэ бэтэрээнэ Николай Филиппович Трофимов өр сылларга кылаабынай зоотехнигынан, сопхуос дириэктэринэн үлэлээбит, тыа хаһаайыстыбатын салаатын киэҥ билиилээх салайааччыта дириҥник хорутан суруйбут. Дьоһуннаах кинигэҕэ ахтыылары хомуйан, сүҥкэн кылааттарын, сыраларын-сылбаларын Хаҥалас улууһун бааһынай хаһаайыстыбаларын уонна тыа хаһаайыстыбатын кээпэрэтииптэрин Ассоциациятын чилиэннэрэ биэрбиттэрэ. Кинигэ бэчээттэнэн тахсыытыгар 17 бааһынай хаһаайыстыба, ол иһигэр 5 улахан хаһаайыстыбалар салайааччылара: Улахан Аантан Михаил Павлов, Булгунньахтаахтан Акулина Львова, Нөмүгүттэн Евдокия Денисова, Өктөмтөн Тамара Осипова, Төхтүртэн Евгений Никифоров сүрүн спонсордарынан буоллулар.
Тыа сирин туруу үлэһит, чэрдээх илиилээх хоһуун дьоно, самаан сайын өҥүрүк куйааһыгар, көмүс күһүн сөрүүн күннэригэр, бытархан тымныылаах кырыа кыһын, сааскы сылаас ылааҥы кэмнэргэ, төрөлкөй төрүөҕү, эмис эти, үрүлүйэ сүүрэр үрүҥ илгэни дэлэтээччилэр, туораахтаах култуураны үүннэрээччилэр сурукка тиһиллэн, кинигэҕэ киирэн үйэтитилиннилэр. Кэм-кэрдии, сыл-хонук аастаҕын ахсын, уруккубут умнуллубатын туһугар кинигэлэр суруллаллар, этэргэ дылы, «суруллубут суоруллубат”. Үлэһит үтүөтэ, тыа сирин хоһуун дьонугар ананан, баай ис хоһоонноох кинигэ күн сирин көрдө. Саҥа кинигэни атыылаһыҥ, дьоҥҥутугар бэлэх уунуҥ!
Билсэр телефоҥҥут нүөмэрэ: 8914-281-77-75.
Розалия Петрова, Хаҥалас улууһун бааһынай хаһаайыстыбаларын уонна тыа хаһаайыстыбатын кээпэрэтииптэрин Ассоциациятын бэрэссэдээтэлэ, СӨ тыатын хаһаайыстыбатын туйгуна.