Улуу Кыайыы 80 сылыгар
Россияҕа Аҕа дойдуну, Саха сиригэр Ийэ дойдуну көмүскээччилэр сылларын чэрчитинэн Тиит Арыы, 3-с Малдьаҕар уонна Тумул оскуолаларыгар бу нэдиэлэ устата араас хабааннаах тэрээһиннэр ыытылыннылар. Ол курдук, 3-с Малдьаҕар оскуолатыгар байыаннай строевой хаамыыга күрэх, Тумул оскуолатыгар военизированнай эстафета, Тиит Арыыга «Уолан ааҕыылара» күрэс буолла.
Чкаловка ыытыллыбыт байыаннай строевой хаамыыга Дьокуускай куораттан полковник, «Кыһыл сулус» уордьан кавалера, Афганистаҥҥа байыаннай дьайыы кыттыылааҕа Иван Васильевич Федоров, полковник, Россия Ыксаллаах быһыыга-майгыга министиэристибэтин Саха сиринээҕи Кылаабынай управлениетын бэтэрээннэрин Сэбиэтин салайааччыта Иван Владимирович Дьячковскай уонна өрөспүүбүлүкэтээҕи Быыһыыр сулууспа үлэһиттэрэ кэлэн ыалдьыттаатылар. Сонуннук ыытыллыбыт тэрээһин бэрт сэргэхтик ааста.
Үөрэнээччилэри патриотическай иитиигэ туһуламмыт нэдиэлэбитин бэйэбит оскуолабытыгар байыаннай строевой хаамыынан түмүктээтибит. Бу курдук оскуолабыт олоҕо, күн аайы күөстүү оргуйар. Өрүүтүн да маннык тэрээһиннэр буола турдуннар.
Христина Гоголева, Вероника Шалесная, Г. В. Ксенофонтов аат. Тиит Арыы орто оскуолатын пресс-киинин суруналыыстара.