— Урут мин Өлүөнэбит очуостарын өрүс уҥуоруттан эрэ кэрэхсии көрөрүм. Билигин манна үлэлээбитим түөрт сыл буолла. Паарка федеральнай таһымнаммыта эбии үлэһити эрэйбитигэр үлэлии киирбитим. Аан бастаан Лабыдьаҕа үктэммитим уонна кэрэтиттэн абылаппытым. «Кэтэмэ» булчуттар уопсастыбаларыгар урут баарым. Син үлэ тугу эрэйэрин билэрим. Бу иннинэ мин Улахан Ааҥҥа олохтоох дьаһалтаҕа землеустроителинэн үлэлии сылдьыбытым. Бүтэн биэрбэт кумааҕы үлэтиттэн сылайбытым, онон түгэн көстүбүтүгэр үлэбин уларытарга быһаарыммытым уонна кэмсиммэтим. Айылҕам уһуйа турар, — диир Спиридон Максимов.
Абыраммыт киһи, Спиридон! Сүрэҕэ сөбүлүүр, дууһата астынар идэтигэр сылдьар буолан.
Билигин 10 күн Лабыдьаҕа үлэлиир, онтон 10 күн сынньанар. Үлэтин астынар. Биллэн турар, кыанар буолуоххун наада, туристары кытары үлэ элбэх билиини-көрүүнү эрэйэр. Көрүдьүөс да түгэннэр баар буолалларын кэпсиир. «Биир американец «Эһэҕит ханна баарый? » диэн турдаҕа үһү… Японецтар, индустар, Швейцарияттан туристар “дьиикэй турист” буолалларын астыналлар, кыһын тымныыга, куһаҕан күҥҥэ-дьылга сылдьалларын ордороллор. Английскайдыы билии ирдэнэр буолла», — диир кини, — «Уопсайынан, пааркаҕа үлэлииргэ саҥа техниканы, араас оборудованиены баһылааһын, билии ирдэнэр. Саас, күһүн омук туристара элбииллэр. Болҕомтону ирдииллэр. Бэрээдэги тутуспат да дьон быгыалыыллар. Квадракоптердары туттабыт, кыһынын буранынан сылдьабыт, суол-иис суох дойдутугар, наука үлэһиттэригэр көмөлөһөбүт. Уларытыһа сылдьан үлэлиибит. Бииргэ үлэлиир дьонум Герасим Егоров, Виталий Асекритов Сиинэттэн буолаллар.
Пааркаҕа үлэ араас хайысхалаах. Өрөмүөн үлэтэ, субуотунньуктар, баһаардар даҕаны буолаллар, дьон сырыытын хонтуруоллааһын о.д.а. Уустуктар элбэхтэр эрээри – киһи кэрэхсиирэ баһыйар. Оттон айылҕата – хатыламмат!».
Спиридон Максимов онон Лабыдьаҕа үлэлии кэлбитин отой кэмсэммэт. Идэлэрин сөбүлүүр дьон – айылҕабыт көмүскэлэ. Спиридон хаартысканан, видеонан дьүһүйэрин туохха да биэрбэт. Бастаан телефонунан түһэрэ үөрэммит, 2018 сылтан – дьоһун камеранан фотосессия бэлэхтиэн сөп. Дьүкээбили түһэрбитэ – хатыламмат көстүү – 15-20 төгүл бу айылҕа дьикти дьүһүйүүтэ ыалдьыттаан ааспытын ахтар.
Өлүөнэбит очуостарыгар дьүкээбил үҥкүүлүүрүн кини курдук көрбүт киһи!
«Өлүөнэ Туруук хайалара» НП пресс-киинэ.