Үөрэх дьылын көрсө
И.М. Яковлев аатынан Покровскайдааҕы 1 №-дээх Покровскай орто оскуоланы быйыл 31 оҕо үөрэнэн бүтэрбитэ, ол иһигэр үс ыччат кыһыл көмүс, түөрт үрүҥ көмүс мэтээллэринэн. Бу оскуола улууска выпускниктара үрдүк үөрэххэ киириилэринэн биир бастакынан буолла. Үөрэх кыһатыгар бастакы чуораан чугдаараары турдаҕына оҕолор сайыҥҥы сынньалаҥнарын туһунан уонна саҥа үөрэх дьылын кэлэктиип туох сонуннардаах көрсөрүн кылгастык билиһиннэрэ түһэригэр оскуоланы отуттан тахса сыл салайан кэлбит дириэктэр, Саха өрөспүүбүлүкэтин үөрэҕириитин үтүөлээх үлэһитэ Спиридон Шишигинтан көрдөстүм:
— Оскуоланы быйыл бүтэрбит оҕолорбут бары араас үөрэххэ киирдилэр. Ол иһигэр дойду үрдүк үөрэҕин кыһаларыгар 7, Сахабыт сиригэр 10 ыччат. Сорохтор орто анал үөрэҕи таллылар. Быйылгы үөрэх дьылыгар ахсыс физика-математика кылааһыгар 18 оҕо киирдэ. Учууталларбыт бары предметтэргэ бааллар. Балаҕан ыйын 2-гэр үгэс быһыытынан Билии күнүнүнэн үөрэх дьылын саҕалыахпыт, онтон Тыа хаһаайыстыбатын научнай-чинчийэр институтун бааһыналарыгар үүнүү хомууругар көмөлөһүөхпүт. Үүнэр сыл саҥа ситиһиилэринэн арыалланыа диэн эрэнэбит. Онтон сайыҥҥы сынньалаҥ оҕолорго туһалаахтык ааста — 25 үөрэнээччи стационарнай лааҕырдарга сынньанна, оскуолабытыгар чэбдигирдэр лааҕырдар үлэлээтилэр, манна 195 оҕо сырытта, сөбүлүүр дьарыгар кытынна. Сорохтор дьонноругар үлэҕэ көмөлөһөн сайылаатылар. Саҥа үөрэх дьылынан, күндү оҕолор, педагогтар, көмөлөһөөччүлэрбит — төрөппүттэр! — эҕэрдэнэн түмүктээтэ сонунун Спиридон Спиридонович.
Эҕэрдэлэргэ кыттыһабыт, ситиһиилэри баҕарабыт!
Людмила Мордовская.