Дьокуускайга, Покровскайга биһиги биир дойдулаахпыт, ССРС дуобат спордун маастара Хачыкааттан төрүттээх Хаҥалас улууһун бочуоттаах олохтооҕо Игорь Никифоров аатыгар үрдүкү лигаҕа дуобакка үс күннээх өрөспүүбүлүкэтээҕи күрэхтэһии ыытылла турар.
— Күрэхтэһии арыллыыта субуотаҕа М.К.Аммосов аатынан Хотугулуу-Илиҥҥи федеральнай университекка буолла. Биир дойдулаахпыт туһунан үгүс кэрэ тыл иһилиннэ, — диэн иһитиннэрдэ дуобат федерациятын салайааччыта Юрий Никифоров.- Доҕорбут Игорь Андреевич элбэх ыччаты бу өркөн өй оонньуутугар үөрэппитэ, ииппитэ умнуллубат. Кини үөрэнээччилэрэ билигин ыччаттарын эрэ дуобакка уһуйар буолбакка, маннык күрэхтэһиилэргэ спонсордыылларын үөрэ көрөбүт. Ол курдук, бөдөҥ тутуу тэрилтэтин салайар Игорь Лебедев күрэх сүрүн спонсорынан буолла.Махтанабыт!
Саха сириттэн кэлин сылларга 18 гроссмейтер үүннэ. Таарыччы эттэххэ, сэтинньи саҥатыгар Түрцияҕа 17 дойду күүстээх дуобаччыттара кыттыылаах улахан чемпионакка биһиги университеппытыттан үп-экономика институтун үһүс кууруһун устудьуона Тунаара Федорова, Пединститут бэһис кууруһун устудьуона Альбина Большакова, аан дойдутааҕы гроссмейстер аатын ыллылар. Дайаана Кондратьева эмиэ гроссмейтер буолбута. Тунаара чемпионакка ыччаттарга уонна устудьуоннарга эмиэ бастаабыта. Устудьуоннарга университет салалтата Махтал суруктары, бэлэхтэри туттарда.
Университекка күрэхтэһии арыллыытыгар Игорь Никифоров кэргэнигэр, дьахталлартан дуобакка ССРС маастарыгар, 10 сыл субуруччу өрөспүүбүлүкэ дьахталларын дуобакка чөмпүйүөнүгэр, «СГУ-ХИФУ бастыҥ выпускнига» бэлиэ хаһаайкатыгар «СӨ дуобат спордун тарҕатыыга уһулуччу кылаатын иһин» өрөспүүбүлүкэтээҕи дуобат спордун федерациятын бэлиэтии туттарда – диэн эбэн эттэ Юрий Егорович.
Бу тэрээһиҥҥэ Покровскайтан Игорь Никифоровка уһуйуллубут дуобаччыт Александр Якушев настаабынньыгар анаабыт хоһоонун аахта.
Эр дьоҥҥо үрдүкү лига күрэхтэһиитин субуота күн Покровскайга арыйдылар. Дуобат спордугар Хаҥаластааҕы федерация салайааччыта Родион Кононов бу эппиэттээх тэрээһини иилээн-саҕалаан ыытар.
Людмила Мордовская.
Юрий Никифоров хаартыскаҕа түһэриилэрэ.