Драматург Степан Ефремов төрөөбүтэ
120 сылыгар
Хаҥаласка биир дойдулаахпыт, саха биллиилээх драматура, Саха сирин искусствотын үтүөлээх диэйэтэлэ, Саха АССР үтүөлээх учуутала, Хаҥалас оройуонун бочуоттаах олохтооҕо Степан Павлович Ефремов 120 сааһын бэлиэтиир тэрээһиннэр саҕаланнылар.
Покровскай куорат киин бибилэтиэкэтигэр Степан Ефремовка аналлаах декада аһыллыыта үрдүк тэрээһиннээхтик буолан ааста. Тэрээһини бибилэтиэкэр Валентина Колесова иилээн-саҕалаан ыытта. Манна Степан Павлович кыыһа Антонина Дьяконова аҕатын туһунан ахтыытын мустубут дьон долгуйа иһиттибит. Хаҥалас улууһун култуураҕа уонна духуобунай сайдыыга управлениетын салайааччыта Сергей Павлов декада аһыллыбытынан эҕэрдэлээтэ уонна биир дойдулаахтарын хаҥаластар олох умнубаттарын бэлиэтээтэ. Степан Ефремов драмалара бу күҥҥэ диэри Хаҥалас тыйаатырдарын репертуардарыгар киирэн дьон-сэргэ биһирэбилигэр тахсаллар. Бу тэрээһиҥҥэ 2-с Дьөппөннөөҕү норуот тыйаатыра “Ини-бии” драматтан, Өктөмнөөҕү норуот тыйаатыра «Кийиит» кэмиэдьийэттэн быһа тардан көрдөрдүлэр.
Декада чэрчитинэн хаҥаластар Дьокуускай куорат литературнай музейыгар Степан Ефремовка аналлаах ахтыы-киэһэни үрдүк таһымҥа ыыттылар. Манна Ил Дархан сүбэһитэ Андрей Борисов, култуура министра Афанасий Ноев, саха сирин суруйааччылара кыттыыны ыллылар.
А.С. Данилова аатынан “Барҕарыы” култуура киинин эдэр специалиһа Алексей Фомин ырыата, Өктөмнөөҕү норуот тыйаатырын артыыстара Лариса Атласова, Гурий Сысоев «Кийиит» кэмиэдьийэттэн оонньуулара дьон сэҥээриитин ыллылар.
Биллиилээх драматург Степан Ефремовка аналлаах тэрээһиннэр өссө да салҕаналлар.
Федора Фомина, Өктөм.