Покровскайга Айсен Сивцев-Айсиэн Дойду сценографиятынан Туйаара Егорова туруоруутунан көҥүл тустууга Бастакы олимпийскай чөмпүйүөммүт, ССРС спордун үтүөлээх маастара, Сэбиэскэй Сойуус уонна Россия үтүөлээх тириэньэрэ, Саха норуотун аар-саарга аатырдыбыт Роман Михайлович Дмитриев төрөөбүтэ 75 сааһын көрсө «Сулус буолан умайдын…» испэктээҕи Эдьигээн эбэҥки национальнай оройуонун «Эйгэ» этнокультурнай Киинин үлэһиттэрэ көрдөрдүлэр. Манна сүрүн оруолу, Роман Дмитриевы, улуус баһылыга Василий Сорокин толордо.
Испэктээк иннинэ ыалдьыттарбыт атыы-эргиэн дьаарбаҥкатын тэрийдилэр. Онно болбукта эриэхэтиттэн барыанньа, уомул балык искэҕэ, ыыһаммыт уомул, күндүөбэй балыктан кэнсиэрбэ, дьуукала о.д.а. ас арааһа тардылынна. Итини сэргэ талааннаах тарбахтаах уус дьон оҥоһуктарын быыстапката турда.
Хаҥалас улууһун баһылыга Олег Иринеев уонна Эдьигээн эбэҥки национальнай оройуонун баһылыга Василий Сорокин инникитин бииргэ үлэлииргэ Сөбүлэһии түһэристилэр.
Уйбаан Уйгуурап.