Үтүө сонун
Бу үтүө сонуну улууспут дьаһалтатын баһылыгын эбээһинэһин толорооччу Василий Андреев уонна дьокутаат Анатолий Антонов салайар Улууспут мунньаҕын Саҥа дьыл иннинээҕи сессиятыгар быһаарыыта бэлэхтээтэ. Махтал буоллун, общественноспыт аатыттан туруорсубут Людмила Колесова салайааччылаах “Өлүөнэ долгуннара” Хаҥалас литературнай кулуубугар.
Биллиилээх буойун-суруйааччы, суруналыыс ИсайНикифоров үүммүт сылбыт ыам ыйын 1 күнүгэр төрөөбүтэ 110 сылын бэлиэтиэхпит. Хаҥаластар бу уран тыл маастарын, киһи киэнэ кэрэмэһин, 1943 сылтан 1-кы Украинскай фроҥт бойобуой суолларынан Белоруссияны уҥуордаан Берлиҥҥэ тиийэ сэриилэспит Кыһыл Сулус уордьаннаах, элбэх бойобуой мэтээллэрдээх, Саха АССР култууратын үтүөлээх үлэһитин, Улууспут бочуоттаах олохтооҕун, ССРС суруйааччыларын Сойууһун чилиэнин, хаһыаппыт бастакы редактордарыттан биирдэстэрин үбүлүөйдээх сылын өссө биир үтүө сонуннаах көрсөбүт. Ол курдук, быйыл сайын Покровскайга Исай Никифоров аатынан уулусса атын үс уулуссаны кытары олохтоох көҕүлээһин бырагырааматынан саҥардыллан саҥа аспаалынан бүрүллүө. Онон улууспут, куораппыт салалтатыгар, дьокутааттарыгар уонна олохтоохторугар, өйөөбүт тустаах министиэристибэҕэ барҕа махтал тылларын аныыбыт.
Бу уулуссаҕа, бу дьоҕус чуумпу мас дьиэҕэ биһиги Исай Прокопьевичпыт чулуу айымньыларын айбыта, ыччаттара улааппыттара. Манна Сахабыт сирин, Россия эбэ хотун суруйааччылара элбэхтик ыалдьыттаабыттара, дойдубут сайдыытын туһугар бүөмчү да, хорсун да санааларын үллэстибиттэрэ. Бу дьиэ айыы тыынынан илгийиэ, олохпут сайдыытыгар саҥа сүүрээни киллэриэ. Хаҥаластар өр күүтүллүбүт литературнай түмэллэнэр баҕа санаабыт туолутугар дьоһун аартык арылынна. Хайа, уонна, үйэлээххэ сүгүрүйээччилэргэ, кэрэ дойдубутун кэрэхсээн кэлэр туристарбытыгар утары уунардаах, тугу көрдөрөрдөөх буолуохпут.
Литературнай фестиваль буолар
Аны күһүн «Благодать большого снега” диэн саха суругунан литературата төрүттэммитэ 125 сылыгар Сахабыт сиригэр улахан аан дойдутааҕы киэҥ хабааннаах литературнай фестиваль буолара күүтүллэр. Тэрээһин чэрчитинэн улуус-улуус аайы суруйааччылар суолларынан научнай экспедициялар, “Мы молодые» ыччат форума, оҕо айар лааҕыра, “Книжный ветер» кинигэ фестивала, оҕолорго литературнай күрэх о.д.а. араас тэрээһиннэр буолуохтара, үгүс ыалдьыттары көрсүөхпүт.
Хаҥалас талааннаах дьонунан тутайа илик. Ол туоһутунан ааспыт сылга икки биир дойдулаахпыт Саха сирин суруйааччыларын сойууһугар киириилэрэ буолар.
Үтүө дьыала батыһааччылардаах буолуохтаах, көмө эрэйиллэр күнүгэр-дьылыгар дьоммут-сэргэбит инникитин даҕаны өйөбүл буолуо диэн эрэнэбит. Биллэн турар, бу сэбиэскэй тутул кэминээҕи дьиэ сөргүтүүнү, кэккэ өрөмүөнү эрэйэр. Суруйааччы сиэнэ урбаанньыт, улуус дьокутаата Сергей Гребнев көмөлөһөргө бэлэм. Ол эрээри, соҕотох, олус түбүктээх сылдьар киһиэхэ найылаабакка, бары көхтөөхтүк кыттан туох кыалларынан субуотунньуктаан эҥин күүс-көмө буоларбыт эрэйиллэр. Литературнай кулууп чилиэннэрэ, “Хаҥалас” хаһыат редакциятын кэлэктиибэ бу кэскиллээх дьыалаҕа кыттарга бэлэммит.
Норуот күүһэ-көмүөл күүһэ! Өйүөҕүҥ!
Людмила Аммосова.