Биһиги интернаппытыгар түүҥҥү иитээччинэн 30 сылтан тахса үлэлээбит Ирина Егоровна Куприянова оҕолорго олус истиҥ сыһыаннаах, үтүө сүбэһиппит буолар. Төһөлөөх элбэх оҕо кини сылаас илиитин иһинэн иитиллэн ааспыта булуой?!
Ирина Егоровна иистэнньэҥ идэлээх, нэһилиэккэ ыытыллар кэнсиэртэргэ таҥас арааһын иистэнэр, биһиги таҥаспытын эмиэ куруук тигэр.
Байыаннай дьайыыга сылдьар саллааттарга анаан ичигэс таҥастары, көстүүмнэри тигээри Ирина Егоровнабыт быйыл сайын уоппускатыгар Дьокуускай куоракка киирэн «Илии сылааһа» иис сыаҕын иистэнньэҥнэрин кытта билсэн таҥас бөҕөтүн тиктилэр. Сайын киһи барыта сынньанар кэмигэр бу үтүө санаалаах Далбар хотуттар үлэ үөһүгэр сырыттылар. Аны туран, Ирина Егоровна Покровскайга баар уран тарбахтаах иистэнньэҥнэрдиин кыттыһан «Илии сылааһа» диэн өрөспүүбүлүкэтээҕи аахсыйаҕа эмиэ кытынна.
Биһиги үтүө санаалаах, туруу үлэһит, эйэҕэс ийэ, эбээ Ирина Егоровнанан киэн туттабыт. Кини сымнаҕас илиитин сылааһа хас биирдии саллаакка тиийэн, биир дойдулаахтарбыт эйэни олохтоон, кыайыылаах төннүөхтэрэ диэн эрэнэбит.
Ира Строева, 1-кы Дьөппөн санаторнай оскуола-интэринээтин 6 кылааһын үөрэнээччитэ.