Спорт 16 көрүҥүн түмэ тарпыт II-с “Азия оҕолоро” спортивнай оонньууларыгар 2000 сыллаахха атырдьах ыйын 4—13 күннэригэр 13 дойдуттан уонна Россия 22 регионуттан барыта 1178 спортсмен кыттыбыта. Оонньуулары көрсө СГУ наукалар факультеттарын үөрэтэр корпуһа, 1500 миэстэлээх уопсай дьиэ, “Долгун” бассейн, “Юность” чэпчэки атлетика манеһа үлэҕэ киирбиттэрэ.
“Азия оҕолоро” оонньууларын былааҕын күөрэччи көтөҕөр үрдүк чиэс чэпчэки атлетикаҕа оҕолорго Россия күрэхтэһиитин кыайыылааҕа Татьяна Наховаҕа уонна боксаҕа дойду икки төгүллээх кыайыылааҕа Алексанр Ивановка сүктэриллибитэ. Спринтерскэй сүүрүүгэ Россия оҕолорун кыайыылааҕа, Саха сирин сүүмэрдэммит хамаандатын хапытаана Федор Жирков оонньуулар уоттарын умаппыта. Барыта 116 комплект мэтээл оонньоммута. Саха сирин сүүмэрдэммит хамаандата 90/33 кыһыл, 23 үрүҥ көмүс, 34 боруонса мэтээли ылан, барыларыттан чорбойон тахсыбыта.
Корея Народнай Демократическай Республикатын спортсменнара 58/32 кыһыл, 5 үрүҥ көмүс, 11 боруонса мэтээли ыланнар хамаанданан иккис буолбуттара.
“Азия оҕолоро” оонньууларыгар аан бастаан кыттыбыт сыралыйар күннээх Индия сүүмэрдэммит хамаандата 34/9 кыһыл, 10 үрүҥкөмүс, 15 боруонса мэтээли ылбыта. Тайвань эдэр спортсменнара 14/8 кыһыл, 4 үрүҥ көмүс, 2 боруонса мэтээл иилинэн хамаанданан төрдүс буолбуттара. Кинилэр кэннилэриттэн 32/7 кыһыл, 15 үрүҥ көмүс, 10 боруонса мэтээллээх Хабаровскай кыраай спортсменнара бу испииһэги салҕаабыттара.
Азия континенын алта бастыҥ хамаандатын иһигэр 29/6 кыһыл, 13 үрүҥ көмүс, 10 боруонса мэтээллээх Монголия оҕолоро киирбиттэрэ, Саха сирин хамаандата 28/6 кыһыл, 8 үрүҥ көмүс, 14 боруонса мэтээли ылбыта.Орто Азия хамаандаларын барытын түмэ туттахха 20 мэтээллээхтэр, Казахстан 11/4 кыһыл, 4 үрүҥ көмүс, 3 боруонса, Кыргызстан 9/3 кыһыл, 1 үрүҥ көмүс, 5 боруонса. Уон бастыҥ хамаанда иһигэр 6/3 кыһыл, 1 үрүҥ көмүс, 2 боруонса мэтээллээх Иркутскай уобалас спортсменнара киирбиттэрэ.
Вьетнам 4 оҕото улаханнык сөхтөрбүтэ.Кинилэр киэһэ кэлээт, саахымакка күрэхтэспитинэн барбыттара. Түөрт дуоскаҕа ыытыллыбыт күрэхтэһиигэ 3 кыһыл көмүс уонна 1 боруонса мэтээли түөстэригэр иилинэн, саахымакка хамаанданан холкутук бастаабыттара. Ыраах Малайзияттан кэлбит спортсменнар 9/1 кыһыл, 3 үрүҥ көмүс, 5 боруонса мэтээли дойдуларыгар илдьэ барбыттара.
“Азия оҕолоро” оонньууларын Гимнэ Василий Босяк мелодиятыгар, Тамара Попова тылларыгар ылламмыта.
“Азия оҕолоро” иккис оонньууларыгар Саха сирин 9 рекорда олохтоммута: чэпчэки атлетикаҕа, хотугу многоборьеҕа, саха национальнай атах оонньууларыгар — үстүү рекорд.
“Азия оҕолоро” оонньуулар кылаабынай судьуйатынан. Олимпийскай оонньуулар икки төгүллээх чемпионнара Борис Лагутин үлэлээбитэ.
Василий МОЖУКОВ, СӨ спордун бэтэрээнэ. Покровскай к.