Култуура олоҕо
Хаҥалас улууһун “Арчы Дьиэтэ” норуот айымньытын киинин тэрийиитинэн сылаас сыдьаайдаах, кэрэ кэһии көстүүлээх, иэйии уонна айар талаан тулааһыннаах күн «Саргы түһүлгэтэ» култуура киинигэр ыытылынна. Өрөспүүбүлүкэҕэ биллэр тарбахтарыгар айар талааннаах уонна ырыа куттаах дьоммут-сэргэбит кэлэннэр, дохсун ытыс тыаһынан доҕуһуолланан Саҥа Дьыл иннинэ бэрт сэргэх тэрээһини ыытаммыт кэлбит дьон астынан-дуоһуйан, санаалара көтөҕүллэн үөрэн-көтөн барбыттара биһигини, тэрийээччилэри, астыннарда!
Биэчэр иннинэ фойеҕа Саҥа Дьыл бырааһынньыгар аналлаах дьаарбаҥка ыытыллан кэлбит дьон таҥас-сап, бэлэх-туһах атыылаһан тарҕастылар.
Биэчэри бэйэлэрин ылбаҕай ырыаларынан: СӨ норуодунай артыыстара Клавдия, Герман Хатылаевтар, Аскалон Павлов, Александр Бурнашов, СӨ култууратын туйгуна, эстрада тыйаатырын артыыһа Эрчим, СӨ үтүөлээх артыыһа Сахая, улууспут талааннаах кэрэ куластаах ырыаһыттара Анна Торохова, Ирина Протопопова, Туйаара Герасимова киэргэттилэр. Саха сиригэр биллэр-көстөр дизайнердар Зинаида Заболоцкая кэрэ таҥастарын, норуот маастара «Иис-уус харыстас» тэрилтэттэн – Халлаама Нарылы Куонду Кыыһа сахалыы коллекцияларын, СӨ норуотун маастара Анисья Фадеева “Сир симэҕэ”, Дыгыйа — Варвара Митрофановна сахалыы халадаайдарын, хаһыаччыктарын, соннорун, Анастасия Борисоваха тайдааһын ньыматынан соннорун, үрүҥ көмүстэн уонна алтантан оҥоһуллубут далбар-хотуттарга аналлаах киэргэллэри, Дьокуускай куорат “Сильвия”, Покровскай куорат “Amor” маҕаһыыннар, бырааһынньыкка кэтиллэр таҥастарын Покровскай куорат «Надежда» дефиле студия (сал. Надежда Алексеева) кэрэ аҥаардара кэтэн хааман сыанаттан көрдөрөннөр көрөөччүлэрбитин сөхтөрдүлэр. Биэчэри Сардаана Федорова иилээн-саҕалаан ыытта.
Инникитин даҕаны маннык бырайыактары олоххо киллэрэр былааммыт үгүс.
Мотрена Гаврильева, «Арчы Дьиэтэ» киин уус-уран салайааччыта.