Төхтүргэ А.И. Борисов аатынан “Эркээни” Култууракиинигэр Улуу Кыайыы 80 сыллаах үбүлүөйүн көрсө үлэ,тыыл бэтэрээнэ, Үлэ кыһыл знамятын кавалера, Төхтүр нэһилиэгин бочуоттаах олохтооҕо, импровизатор-хомусчут, оһуокайдьыт Марфа Михайловна Заморщикова аатынан «Эркээни кустуга” иккис өрөспүүбүлүкэтээҕи норуот тылынан уус-уран айымньыларын көрүҥнэригэр күөн-күрэс буолан ааста. Тойук, чабырҕах, хомус, норуот ырыата, оһуокай көрүҥнэригэр бөлөҕүнэн арахсан уопсайа 80-ча киһи Мирнэй оройуон Арыылаах нэһилиэгиттэн, Сунтаар,Ньурба, Бүлүү, Таатта, Мэҥэ Хаҥалас, Хаҥалас сириттэн-уотуттан кэлэн сахалыы кылыһахтаах ырыаны-тойугу дьиэрэтэ туойдулар.
Марфа Михайловна Заморщикова 1924 сыллаахха колхуостаах дьиэ кэргэҥҥэ тохсус оҕонон күн сирин көрбүтэ. Күөгэйэр эдэркээн сааһа Аҕа дойду сэриитин сылларыгар ааспыта. 60 сааһын туолуор диэри “Өктөм” сопхуоска ыанньыксытынан үлэлээбитэ, онтон кэлин “Мичил” ыччат комсомольскай ферматыгар настаабынньыктаабыта. Нэһилиэк общественнига, көхтөөх кыттааччыта “Кэскил” норуот ансаамбылыгар хомусчутунан сылдьыбыта, хомус тардыы төрүт ньымаларыгар дьонууһуйбута, оһуокайдьыт буолан араас күрэхтэргэ кыттара. «Эркээни кустуга» күрэҕи Марфа Михайловна оҕолоро, сиэннэрэ көҕүлээн 30 тыһ. солк. суммалаах бирииһи туруордулар, кинилэргэ барҕа махталбытын тириэрдэбит.
Норуокка кэпсэнэрин курдук, Бүлүү бөлөх улуустарбыт өбүгэттэн хаалбыт ураты айымньыларбытын сыыска-буорга түһэрбэккэ, ураты харыстабыллаахтык илдьэ сылдьаллара, кэлэр кэнчээри ыччаттарын үөрэтэ-иитэ сылдьаллара ордуккиһини сэҥээрдэр, астыннарар. Төрөөбүт Төхтүрбүтүттэн «Дьүөгэ» эбээлэр түмсүүлэрэ норуот ырыатын толорон, «Кэскил кэнчээрилэрэ» хомусчут оҕолор ансаамбылларакыттаннар лауреат аатын ыллылар. Күрэхпит түмүгүнэн бастыҥтан бастыҥнар биирдиилээн, анал ааттарынан, бөлөҕүнэн ааттаннылар. Хайҕал суруктарынан, бэлиэстатуеткаларынан наҕараадаланнылар. Марфа Михайловна оҕолоро, сиэннэрэ туруорбут бирииһин, туох да мөккүөрэ суох Сунтаар улууһун оҕо ускуустубатын «Чөмчүүнэ» фольклорнай ансаамбыла ылла уонна 15 тыһ солк.наҕараадаланна, Мирнэй оройуонун Арыылаах нэһилиэгин фольклорнай кэлэктиибин салайааччытыгар Марфа Платоноваҕа 10 тыһ солк, Ньурбаттан кэлбит Вова Степановка 5 тыһ. солк. туттарылынна, бастыҥ салайааччынан ааттаммыт Анна Чярина анал бэлэх тутта.
Күрэх дьүүллүүр сүбэтигэр импровизатор-хомусчут, СӨ култууратын туйгуна, Жатайдааҕы «Росток” эбии үөрэхтээһин уһуйааччыта,“Маяк” КК иһинэн үлэлиир “Айыллаана” фольклорнай түмсүү салайааччыта Елена Тастыгина; “Арчы дьиэтэ” духуобунай киин испэсэлииһэ Лебедева Прасковья уонна бэрэссэдээтэлинэн Аан дойдутааҕы хомус музейын экспозиционнай-выстовачнай отделын сэбиэдиссэйэ, СӨ култууратын туйгуна, импровизатор-хомусчут, хомус Аан дойдутааҕы уопсустубатын чилиэнэ Туяра Жиркова сүрдээх таһаарыылаахтык үлэлээтилэр.
Дария Захарова-Дайыына, Төхтүр с.