Кыстык хаамыыта
Хачыкаат нэһилиэгин олохтооҕо сүөһү иитиитинэн утумнаахтык дьарыктанар Валерий Ефремов, бааһынай хаһаайыстыбатыгар сыллата сүөһүтүн төбөтүн ахсаанын эбэн иһэр.
Дьыл оройун этэҥҥэ ааһан сүөһүтүн аһылыгынан отунан, комбикорманан хааччынан күөххэ үктэниэххэ дылы холкутук тиийэр бүччүм санаалаах. Кыстыыр отун быһа холоон 200 туоннаны өрүс арыытыгар оттуур, барытын тиэнэн далыгар таһан турар. Быйылгы кыстыкка уопсайа 91 төбө хороҕор муостаах кыстыыр, билигин төрүөх саҕаланан ыанар ынаҕа 52 төбөҕө тиийиэхтээх. Бүгүҥҥү күн туругунан 10 ынах төрөөбүт, биир ынах игирэлэммит. Хаһаайыстыбатыгар солбуллубат туруу үлэһитэ, Уус Алдан улууһуттан төрүттээх Александр Ущницкай буолар. Маны таһынан сүөһү көрүүтүгэр бырааттара, киэһэ өттүгэр кэргэнинээн көмөлөөн үлэлииллэр.
Сыллата буоларын курдук, үүтү туттарыы кыһалҕата ыган кэлбит. Билигин тыа сирин сүөһүлээх дьонугар төрүөх саҕаланан үүт туттарыан баҕалаах элбээн иһэр. Бу кыһалҕаны быһаарарга «Хаҥалас-Ас» ТХПК үүт тиэйэр-таһар массыынатын ыыта илик. Оттон Валерий Ефремов хаһаайыстыбата үүккэ былаанын толорор инниттэн, билигин хас ыам кэннэ үүттэрин тута сүөгэй оҥорон Покровскай куоракка маҕаһыыннарга туттаран батарар.
Ил Дархан Айсен Николаев «Саха Өрөспүүбүлүкэтигэр тыа хаһаайыстыбатын сайдыытын стратегическай хайысхаларын туһунан» Ыйааҕа, чуолаан, субсидияны тыырыы боломуочуйаларын улуустар дьаһалталарыгар биэрии олоххо сөптөөхтүк киирэн, тус хаһаайыстыбалар сайдыыларыгар быһаччы дьайыаҕар баҕарабыт.
Уйбаан Уйгуурап.
Хаартыскалар: Валерий Ефремов архыыбыттан туһанылыннылар.