Медицинскэй идэлээхтэри тыа сиригэр үлэлииллэрин көҕүлүүр «Земскэй доктор» уонна «Земскэй фельдшер» бырагыраамалар «Доруобуйа» национальнай бырайыак чэрчитинэн үлэлииллэр. Тиит Арыы врачебнай амбулаториятыгар быйыл күһүн «Земскэй фельдшер» бырагырааманан эдэр испэсэлиис Валерия Тихонова үлэлээн эрэр.
Валерия Валерьевна Сунтаар улууһун Тойбохойуттан төрдүлээх. Фельдшер идэтин баһылаан баран төрөөбүт улууһугар үлэлээбит, онтон сир уларытар соруктаах «Земскэй фельдшер» бырагыраамаҕа кыттан биэс сылга үлэлиир дуогабардаах Тиит Арыы нэһилиэгэр ананан кэлбит.
— Манна үлэлээбитим оруобуна икки ый буолла. Кэлээппин кытта дьиэ-уот биэрбиттэрэ — 4 кыбартыыралаах уопсай дьиэҕэ биир кыбартыыраҕа олоробун. Дьиэбит киин ититэр ситимҥэ холбонон турар, онон сылаас. Бу иннинэ уһук нэһилиэктэргэ үлэлии сылдьыбытым, онон тэҥнээтэххэ олорор да, үлэлиир да усулуобуйа үчүгэй. Биһиги дьоҕус кэлэктииппитигэр төрдүөбүт – уопуттаах медсиэстэрэм Диана Васильева элбэх сүбэ-ама биэрэр, балыыһабыт ырааһын Светлана Дружинина хааччыйар, кини эмиэ көмөлөһөн абырыыр. Скорай массыыналаахпыт, онно суоппарынан өр сыл Михаил Строев үлэлиир.
Саас балыыһабытыгар аптечнай киоск арыллыбыт буолан эминэн хааччыллыылахпыт, нэһилиэнньэбит сакааһынан наадыйар эмтэрин аҕала турабыт. Тиит Арыы олохтоохторун таһынан Чкалов, Тумул ыарыһахтарын көрөбүн, нэһилиэнньэбин кытта дьэ билсэн-көрсөн эрэбин, — диэн эдэр испэсэлиис кылгастык кэпсээтэ.
Билигин Тиит Арыы врачебнай амбулаториятыгар өссө быраас вакансията аһаҕас эбит.
Ольга Гермогенова.