Хаартыскаҕа — Тумул нэһилиэгин түс-бас дьоно, үлэ бэтэрээннэрэ Егор Егорович уонна Евдокия Никифоровна Герасимовтар (Хаҥалас улууһун “Туйгун” бириэмийэни туттарыыга түһэрэн ылбытым). Үлэ бөҕөтүн үлэлээн кэлбит дьон.
Герасимовтар быйылгы бэлиэ сылга «Бастыҥ дьиэ кэргэн” өрөспүүбүлүкэтээҕи куонкуруска иккис миэстэни ылан “Кыһыл көмүс дьиэ кэргэн” анал ааты ылбыттара. Кинилэр 1973 сыллаахха кулун тутар 30 күнүгэр алаһа дьиэ тэриммиттэрэ. Оччолортон олоххо көхтөөх көрүүлээх дьон, комсомол актыбыыстара этилэр. Түөрт оҕону атахтарыгар туруортаан элбэх сиэн диэни билэн этэҥҥэ олороллор. Билигин даҕаны общественнай олохтон туора турбаттар, ону ити куонкуруска кытта сылдьаллара да туоһулуур.
Дьиэ кэргэн аҕа баһылыга Егор Егорович үйэтин тухары үлэ ыараханыгар, түбүктээҕигэр сылдьыбыта, биллэр механизатор этэ – Х-с пятилетка, коммунистическай үлэ удаарынньыга, ыччат настаабынньыга, социалистическай куоталаһыылар кыайыылаахтара, үһүс истиэпэннээх Үлэ Албан Аата уордьан кавалера, ”Саха Өрөспүүбүлүкэтин тыатын хаһаайыстыбатын бэтэрээнэ”, “Хаҥалас улууһун социальнай-экономическай сайдыытыгар кылаатын иһин»бэлиэлэр хаһаайыннара. Кини улуус чөмпүйүөн тырахтарыыһа этэ, от бөҕөтүн оттоон, мас бөҕөтүн тиэйэн бириэмэни аахсыбакка үлэлээн кэлбит киһи. Ону сэргэ Тумул дьаһалтатын баһылыгынан, биир кэмҥэ землеустроителинэн кытары үлэлээн кэлбитэ, хаста даҕаны оройуон, нэһилиэк Сэбиэттэрин дьокутаатынан талылла сылдьыбыта, тыа сирин олоҕун араас кыһалҕаларын толору билбит киһи.
Ыал далбар-хотуна Евдокия Никифоровна СӨ үөрэҕирии ситимин бочуоттаах бэтэрээнэ, Ленинскэй комсомол 100, СӨ оскуола иннинээҕи саастаах оҕолору итии үлэтин 100 сылларынан бэлиэлэрдээх үлэ бэтэрээнэ. Герасимовтар билигин даҕаны төрөөбүт Тумулларын интэриэһин өрө тутан, дойдуга ил-эйэ баар буоллун, ыччаттар этэҥҥэ сырыттыннар, үлэлээтиннэр, үөрэнниннэр диэн сырдык санаанан салайтаран олороллор. Доруобуйаны, этэҥҥэ буолууну баҕарыаҕыҥ!
Людмила Мордовская.