Уотпуска кэмэ этэнҥэ түмүктэннэ. Дьон ханна сынньана барар эбитий? Билигин урукку курдук ыраах куруортары кэрийбэккэ, чугас да кэккэҕэ сылдьыахха сөп буолан турар. Арааһа сыыспатым буолуо, Сахабыт сирин үгүс дьоно маннык түгэнҥэ Хаҥалас улууһун талан, биһиги диэкки айаҥҥа туруналлар. Сорохтор «дьиикэйдии», бэйэлэрэ улуус устун кэрийэ сылдьан сынньаналлар эбэтэр тэрээһиннээх туризм комплекстарыгар бараллар.
«Туризм уонна территориальнай маркетинг сайдыытыгар агенство» СӨ САТ генеральнай дириэктэрэ Дмитрий Громов Нөмүгү нэһилиэгиттэн төрүттээх буолан, туризм диэн тылы кыра оҕо эрдэҕиттэн билэр:
— Оскуолаҕа үөрэнэр кэмнэрбэр элбэхтик төрөөбүт дойдубут устун сылдьан, туризмҥа бастыкы хардыыны онтон билбитим. Дьиҥэр, кырдьык да, Михаил Ефимович Николаев сөптөөхтүк эппит эбит: «Туризм баар буоллаҕына сайдыы бары хайысхата баар буолуо» диэн. Тоҕо диэтэххэ, бу эйгэ экономика араас хайысхатын барытын таарыйар, тимир көлөннөн айантан саҕалаан оҥорон таһаарар бородууксуйаны, норуот маастардарын оҥоһуктарын, тыа хаһаайыстыбатын, култуураны, спорду уонна д.а. эйгэни. Туризмынан дьарыктанар, биллэн турар, ыарахаттардаах, бу таҥнар таҥас да буолбатах, аһыыр ас да буолбатах, Туризм диэҥҥэ барыта киирэр өйдөбүл — үтүө санааны үөскэтэн, умнуллубат түгэннэри хаалларан.
Аныгы киһи элбэҕи үлэлиир, киириилээх-тахсыылаах, барыылаах-кэлиилээх кэмҥэ олорор. Мантан сиэттэрэн кини үчүгэйдик сынньаныахтаах, күннээҕи түбүгү умна түһүөхтээх. Дьэ манна туризм тэрилтэтэ улахан өҥөнү оҥорор кыахтаах. Онтон ханна сынньана баралларын дьон бэйэтэ талар. Сынньанааччы ырааҕар-чугаһар наадыйбат. Бу иннинэ сылдьыбыттар үтүө өйдөбүлү хаалларан дьоҥҥо-сэргэҕэ кэпсиир буоллахтарына, кинилэр эмиэ ону баран көрүөхтэрин баҕараллар. Ол иһин биһиги куруутун ыалдьыттары көрсөргө бэлэм буолуохтаахпыт.
Онтон сынньанааччылар биһиэхэ кэлэн тугу гыныахтаахтарай? Тохтуур сиргэ хонуохтаахтар, аһыыр сиргэ аһыахтаахтар, сонуну көрүөхтээхтэр, саҥаны билиэхтээхтэр. Манна анаан эмиэ биһиги үлэлиэхтээхпит. Араас сынньалаҥ, аралдьытыы тэрээһиннэрин утары уунуохтаахпыт.
Саха сирэ билигин туризм саҥа сайдар кэмигэр сылдьар. Инникитин тубустар тупсан бөдөҥ ааттаах-суоллаах туристическай тэрилтэлэри кытта тэҥҥэ үлэлиэхпит диэн эрэллээхпит.
Татьяна Владимирова.