Кэпсиэхпин баҕарабын
Лукиннар 2-с Малдьаҕар нэһилиэгэр тыа хаһаайыстыбата сайдарыгар бары күүстэрин, сыраларын, билиилэрин ууран туран үлэлии сылдьар улахан дьиэ кэргэнинэн буолаллар. Ыал ийэтэ Лариса Дмитриевна өр кэмҥэ ыанньыксытынан үлэлээбитэ. Билигин кини оҕолоро төрөөбүт нэһилиэктэрэ сайдарыгар, саха төрүт дьарыга сүтэн-симэлийэн хаалбакка, көлүөнэҕэ көлүөнэҕэ бэриллэн иһэригэр тус кылааттарын киллэрэллэр.
Улахан ыал ийэтэ Лариса Дмитриевна Лукина оскуолаҕа үөрэнэ сылдьан сайын аайы «Булгунньахтаах» сопхуоска ыанньыксытынан үлэлиирэ. Кыһамньылаах үлэтин иһин оскуола үөрэнээччитин бочуотунай грамотанан наҕараадалыыллар. Өрөспүүбүлүкэтээҕи эдэр ыанньыксыттар куонкурустарыгар кини 3 миэстэни, улуустааҕыга 1 миэстэни ылан турардаах.
Лариса Дмитриевна Булгунньахтаах сэлиэнньэтигэр 1965 сыллаахха тохсунньу 23 күнүгэр төрөөбүтэ. Булгунньахтаах орто оскуолатын бүтэрэн баран, Лариса кылааһын оҕолорун кытта «Оскуола — производство — ВУЗ» диэн ыҥырыынан Тойон Арыыга үлэлии барар.
«Икки сыл үлэлээн баран, ыал буолбутум. Ол кэнниттэн Улахан Ааҥҥа көһөн кэлбиппит. Манна олоробут, өр сыл тыа хаһаайыстыбатын эйгэтигэр үлэлээтим. 40-тан тахса сыл ыанньыксыттаатым. Кэргэмминээн Андрей Афанасьевичтыын 7 оҕолоохпут, 15 сиэннээхпит, 1 хос сиэннээхпит. Билигин операторынан үлэлиибин. Хотоммутугар сарсыарда эрдэ кэлэбит. Ыанньыксыттар 4 чаастан ынахтарын ыан саҕалыыллар, онно аппараат бэлэм буолуохтаах. Үлэбит ыарахан да буоллар, киһи үөрэнэр.Үлэлиир усулуобуйабыт үчүгэй. Үлэм кэнниттэн кэтэх сүөһүбүн көрөбүн. Хаста даҕаны өрөспүүбүлүкэтээҕи ыанньыксыттар күрэхтэһиилэригэр ситиһиилээхтик кыттан турардаахпын», — диэн Лариса Дмитриевна кэпсиир.
Лариса Лукина тыа хаһаайыстыбатыгар өр сылларга таһаарыылаах, эппиэтинэстээх үлэтин иһин СӨ Бырабыыталыстыбатын, Тыа хаһаайыстыбатын министиэристибэтин, «Якутия» ФАПК ААУо, Хаҥалас улууһун баһылыгын бочуотунай грамоталарын, махтал суруктарын хаста да ылан турардаах.
Лариса Дмитриевна – үлэ бэтэрээнэ, СӨ Тыатын хаһаайыстыбатын туйгуна, «2-с Малдьаҕар нэһилиэгин сайдыытыгар кылаатын иһин» бочуотунай бэлиэ хаһаайката.Туруу үлэһит Лукиннар түөрт оҕолоро, күтүөттэрэ билигин тыа хаһаайыстыбатын эйгэтигэр үлэлии-хамныы сылдьаллар.
Ол курдук, Анатолий Лукин 2004 сыллаахха 2-с Малдьаҕар оскуолатын 9 кылааһын бүтэрэн баран «Бөртө» сылгы собуотугар үлэлии киирэр. Кыра эрдэҕиттэн сылгыга сыстаҕас буолан кинини тэрилтэ сылгыһытынан үөрэ-көтө ылар, эдэр, эрчимнээх үлэһиккэ наадыйар кэмнэригэр Анатолий үлэтин саҕалыыр.
Өр сыл эҥкилэ суох үлэлээн, СӨ Тыатын хаһаайыстыбатын миниистириттэн махтал суругунан, «Туймаада» ФАПК салататыттан Бочуотунай грамотанан наҕараадаламмыта. Билигин Анатолий уопуттаах сылгыһыттартан биирдэстэрэ буолар. Кэргэнинээн Екатерина Анатольевналыын 4 оҕолоохтор, 1 сиэннээхтэр. Кэтэх хаһаайыстыбалаахтар.
2008 сыллаахха орто уол Афанасий Лукин 2-с Малдьаҕар орто оскуолатын бүтэрэн баран Дьокуускайдааҕы индустриальнай-педагогическай колледжка үөрэнэ киирэр. Биир сыл үөрэнэн баран «Бөртө» сылгы собуотугар сварщигынан үлэлии киирэр. 2012 сыллаахха аармыйаҕа барар, биир сыл буолан баран, төннөн кэлэн, салгыы сылгы собуотугар үлэлиир.
Афанасий бэйэтин эбээһинэһин олус үчүгэйдик толорон, нэһилиэк дьоннорун хайҕалын ылан, бастыҥ сварщик дэттэрэр. Сварщик идэтэ олус умсугутуулаах, киһиттэн билиини, сатабылы эрэйэр. Тыа хаһаайыстыбатын эйгэтигэр элбэх тиэхиньикэ туттуллар буолан, сварщига суох сатамматтар. 2023 с. балаҕан ыйыгар Афанасий Андреевич анал байыаннай дьайыыга ыҥырыллан барбыта, билигин дойдутун көмүскүү сылдьар.
2005 сыллаахха Владислав Лукин оскуола кэнниттэн 7 №-дээх Дьокуускайдааҕы лицейгэ үөрэнэ киирбитэ. 2006 сыллаахха үөрэҕин бүтэрэр уонна 3-с разрядтаах «лесник-егерь» идэтин ылар. 2006-2008 сылларга Владислав аармыйаҕа сулууспалыыр. Аармыйа кэнниттэн 2 сылдойдутугар «Пудов» уонна «Гурьев П.К.» чааһынай предпринимателлэргэ маска үлэлээбитэ. Ол кэнниттэн «Бөртө-Ас» ТХПК харабылынан үлэҕэ киирбитэ. Билигин»Туймаада-нефть»тэрилтэҕэ операторынанүлэлиир.
Кэргэннээх, кыыс оҕолоох.
Лариса Дмитриевналаах кыыстара Анна Тапыева 2012 сыллаахха 2-с Малдьаҕар орто оскуолатын бүтэрэн баранДьокуускайдааҕы педагогическай колледжка оскуола иннинээҕи үөрэх салаатыгар туттарсан киирэр. Дойдутугар төннөн баран, маҕаһыыҥҥа атыылааччынан үлэлиир.
2018 сылга «Бөртө-Ас» ТХПК эт оҥоруу сыаҕар иккисыл үлэлиир. Ол кэнниттэн «Бөртө» сылгы собуотун Үөрэтэр киинин «Аартык» остолобуойугар асчытынан үлэлиир, 2022 сылтан бу тэрилтэҕэ сэбиэдиссэйдиир. Кэргэнинээн Иванныын 3 оҕолоохтор.
Лукиннар күтүөттэрэ Иван Тапыев 2012 сыллаахха 2-с Малдьаҕар орто оскуолатын бүтэрэн баран, аармыйаҕа барбыта. Аармыйа кэнниттэн «Бөртө» сылгы собуотугар сылгы иитээччинэн үлэлээбитэ. Кэнники кэмҥэ «Бөртө-Ас»ТХПК эт оҥоруу сыаҕар үлэлээбитэ.
2023 с. балаҕан ыйыгар анал байыаннай дьайыыга ыҥырыллан барбыта, билигин дойдутун көмүскүү сылдьар.
Валериан Лукин, М.Е.Васильева аатынан 2-с Малдьаҕар орто оскуолатын 10 кылааһын үөрэнээччитэ.