Тиит Эбэҕэ «Дружба fest» түөлбэлэринэн фестиваль «Сарыал” култуура киинигэр буолан ааста. Түөлбэлэр олохтоохторо кулууп толору бары, улаханныын кыралыын мустубуттара, тэрийээччилэри үөртэ. Кыттааччылар ыйы кыайбат кэм иһигэр түөрт түһүмэҕинэн бэлэмнэннилэр. Хас биирдии түөлбэҕэ кулууп испэсэлиистэрэ Фаина Готовцева, Владислав Барамыгин куратордаан, сүбэһитинэн сылдьыбыттара саҥа сүүрээни киллэрдэ.
Бастакы түһүмэххэ түөлбэлэр Аан дойду норуоттарын билиһиннэрдилэр, иккис түһүмэххэ — норуоттар үҥкүүлэрин, бииртэн биир сэргэх үҥкүүнү көрдүбүт. Үһүс түһүмэххэ остуол хотойорунан араас омук аһын бэлэмнээн дьаарбаҥка тэрийдилэр, бэлэмнээбит норуоттарын төрүт астарын кэпсээтилэр. Төрдүс түһүмэххэ норуот биллэр ырыаһытын үтүктэн көрдөрдүлэр. Түмүгэр, дьүүллүүр сүбэ быһаарыытынан, «Сайдыы” түөлбэ (салайааччы Дария Егорова) Россияны билиһиннэрэн кыайыылаах буолла, Гран-при үрдүк аатын ылла. «Ой кэккэ” түөлбэ (сал. Анна Максимова) Узбекистаны билиһиннэрэн бастаата, иккис миэстэ “Орто сайылык” түөлбэ Индияны көрдөрдө (сал. Лена Данилова), үһүс миэстэ – Саха сирин билиһиннэрбит «Кэндэлики” түөлбэ (сал. Валентина Попова) буолла.
Фестивальга хас биирдии түөлбэ олохтооҕо кыттыспыта көстөр, национальнай көстүүмнэри тиктии, хас биирдии үҥкүүнү чочуйуу, ас эгэлгэтин астааһын сыраны ылбыта биллэр. Эр дьон тэрээһиҥҥэ кыттыыта сэдэх эбит буоллаҕына, бу киэһэ ой кэккэлэр уолаттардыын, эр дьоннуун кэлэн кыттыспыттара барыбытын үөртэ. Пародияҕа олус талааннаах, орто оскуола лидерэ, 10 кылаас үөрэнээччитэ Яковлева Амелия бэйэтэ үөрэппит индийскэй үҥкүүтүн 7 кылаас үөрэнээччитэ Кириллина Дариналыын бэртээхэйдик толорон дьон биһирэбилин ыллылар. Орто Сайылык чаҕылхай кэрэ куолара Теплоухова Элина, Очиржапова Санаайа, Борисова Айсена, Протодьяконова Виолетта, Теплоухова Анжелика индийскэй үҥкүүнү үҥкүүлээтилэр, айылҕаттан бэриллибит талааннарын көрдөрдүлэр. Эдьиий Марыынаны сыана бэтэрээнэ Исакова Ульяна итэҕэтиилээхик үтүгүннэ. Дьүүллүүр сүбэҕэ Хоточчуттан Лира Яндреева кэлэн үлэлээтэ, санаатын этэн кыттыспытыгар махтанабыт. Бу түөлбэлэринэн фестиваль сылы түмүктүүр тэрээһининэн буолла.
Анастасия Мордовская, Тиит Эбэ c.