Төрөөбүт тыл, сурук-бичик күнүгэр
Хаҥалас улууһун “Арчы Дьиэтэ” норуот айымньытын киинэ Покровскай куорат “Сказка” уонна “Сардаана” уһуйааннарын оскуолаҕа киириэн иннинээҕи саастаах иитиллээччилэригэр анаан тылы киллэрии туомун ыытта.Туому толордо СӨ култууратын үтүөлээх үлэһитэ, “Арчы дьиэтин” салайааччыта, алгысчыт Лидия Харитонова.
Бу күн оҕолор бары биир киһи курдук сахалыы таҥнан—симэнэн кэлбиттэр. Хата оҕолорбут уу сахалыы саҥарар буолбуттарыттан сүргэм көтөҕүлүннэ, бары ыйытар темаларбар хоруйдаан чуопчааран олороллор, олоҥхоҕо этиллэрдии, чуораан тыаһынан доҕуһуоллатан үрдүк мэҥэ халлаан төрдүс оронугар олбохтоох Одун Хаан Айыыга тиийэн, тыл иччитигэр сүгүрүйэн, оҕолор кэс тылы хатылаатылар, күн эргииринэн киэҥ түһүлгэ тэрийэн оһуокайы оройуттан туттубут. Хас биирдии оҕоҕо төрөппүттэригэр анаан Одун Хаан кэс тыллаах аккырыыккаларын түҥэттим.
Оҕолорбут барахсаттар өрүү ийэ тылынан саҥаран, саха буолан сандаардыннар, киһи буолан килбэйдиннэр.
Лидия Харитонова.