Сааскы сынньалаҥ күннэригэр «Ночь в театре» диэн тэрээһиҥҥэ П.А.Ойуунускай аатынан Саха академическай театрыгар сырыттым.

Бастаан үөрүүлээх арыллыы кэнниттэн фойеҕа үс испэктээкили быһа тардан көрдөрбүттэрэ — «Тулаайах оҕо», «Хаарыан хампа күөх кытылым», «Ойуур». Ол кэннэ станциянан түһүмэхтэри ааспыппыт. Холобура, «Афиша» диэн станцияҕа мин табаарыспын кытта Д.П.Коркин афишатын оҥорбуппут. «Тиэтэйбит» испэктээкил маастар-кылааһыгар сылдьыбыппыт. Манна Павел Ченянов уонна Ильяна Павлова оонньообуттара. Ол кэннэ улахан саалаҕа барбыппыт. Онно 4 испэктээкили көрдөрбүттэрэ: «Лоокуут уонна Ньургуһун», «Отелло», «Ромео уонна Джульетта», «Тулаайах оҕо». Иккилии-үстүү артыыс быһа тардан көрдөрөллөр, ол кэннэ көрөөччүлэр сыанаҕа тахсан оонньууллар. Мин «Тулаайах оҕо» испиктээкилгэ Тыгын Дархан оруолун оонньообутум. Бу оруолу Саха театрын дириэктэрэ, биһиги биир дойдулаахпыт Петр Макаров оонньуур. Кини миигин ыҥыран ылан, гримнээн, таҥас кэтэрдэн, бу оруолу олус долгуйан оонньообутум. Ол кэннэ квест-оонньуу буолбута: 3 испэктээкили библиотекаҕа, лабораторнай саалаҕа уонна Алампа саалатыгар көрдөрбүттэрэ. «Сарсыарда. Уу чуумпуга», «Тиэтэйбит», «Бүтэһик малыыппа» диэн испэктээкиллэри көрдөрбүттэрэ. Кыра саалаҕа артыыстар ыалдьыттары гримнээбиттэрэ, араас паригы, артыыстар атрибуттарын кэтэн хаартыскаҕа түһүөххүн сөп.

Саха театр устунан экскурсияны Татьяна Легантьева уонна Елена Маркова интэриэһинэйдик кэпсээн көрдөрбүттэрэ.

Бу тэрээһиҥҥэ сылдьан астынным. Тоҕо диэтэххэ мин инникитин артыыс буолар баҕалаахпын. Театр олоҕун бу биир күн иһигэр олус үчүгэйдик арыйдылар, хас биирдии кэлбит ыалдьыкка театр ураты тыынын иҥэрдилэр.

Владислав Афанасьев, М.Е. Васильева аатынан 2-с Малдьаҕар орто оскуолатын 9 кылааһын үөрэнээччитэ.

Читайте дальше